Diario Online

Antillas kier pa Aruba adopta mes tipo di maneho tocante establecimento riba e Isla

Publication: Saturday, 7 November 2009. Categoria: General

ORANJESTAD(AAN); Durante un entrevista cu presidente di parlamento di Antillas Pedro Atacho, el a trece dilanti cu un di e asuntonan cu Gobierno di Antillas y di Aruba mester atende cune ta e traficacion di Rubiano y Antillano door di e islanan, pasobra esaki ta un preocupacion grandi pa loke ta con ta trata e personanan aki. Atacho a bisa cu e no ta pidi pa tin traficacion liber, caminda cu hende ta drenta y hasi loke nan kier. Tin biaha tin discusionnan politico cu ta trece un percepcion eroneo.
Antillas su ponencia ta cu ora cu e Arubano of e Hulandes kier establece su mes na Antillas, tin 4 exigencia.

E mester tin entrada, cas pa biba den dje, seguro pa malesa y e no mester ta un problema pa orden publico.

Si e cumpli cu e 4 rekisitonan aki, e ta haya un derecho di establecimento pa ley.
E no tin cu para tur aña den un rij largo na imigracion pa e haya un permiso pa establece.
Esey ta e manera con Antillas ta atende cu e otro personanan di reino.

“Nos no ta pidi pa hende por drenta liber”, segun Atacho kende a bisa cu ta simplemente e hendenan mester cumpli cu e rekisitonan, pa nan por biba den comunidad Antillano.
Antillas ta pidi pa considera pa Aruba haya e mesun tipo di maneho.

Atacho a bisa cu el a ripara por ehempel cu hopi studiante Antillano cu ta studia na Aruba, cu tur aña nan tin cu pasa atravez di un proceso largo y fastioso, pa renoba nan permiso.

El a bisa si cu e ta compronde cu Aruba tin su derecho di establece su maneho, pero mester tin e base pa dialogo cu otro pa wak con por yega na un maneho di mas consenso pa cu otro, pero esey ta tarea di e gobiernonan.