Diario Online

Bun Bu Itchi Kendo Aruba ta finaliza weekend di actividadnan

Publication: Monday, 30 November 2009. Categoria: Deporte

ORANJESTAD (AAN)— Bun Bu Itchi/ Kendo Aruba a tene dos actividad durante weekend ultimo cual tambe ta marca e final di nan programa di actividadnan pa loke tabata aña 2009. E prome actividad cu nan a tene durante weekend tabata un seminario cual tabata algo cu e miembronan a sa di probecha masha hopi mes y e di dos actividad tabata un campeonato den cuadro di Olimpiada di ASU, ambos actividad a tuma lugar den Gymzaal di Julianaschool.
Como resultado di e campeonato aki, nos tin cu den e categoria Kids, e prome lugar a bai pa Paula Castillo y e di dos lugar pa Danbi Velásquez. Den e categoria Beginners, e prome lugar a bai pa Joseph Castillo, e di dos lugar a bai pa Christel Cheenni y e di tres lugar pa Yee Ling Ho.

Den e categoria All Aruban, e prome lugar a bai pa Björn Brandts, e di dos lugar a bai pa Maggid Reategui, e di tres lugar tabata Sebastian Ho-Kang-You y e di cuater lugar tabata Eloy Arends.
Tambe a duna reconocimento na e tres finalistanan di e categoria Beginners cu e Fighting Spirit Award 2009 pa nan excelente demostracion di corahe den competencia.

Entre otro e competidor Björn Brandts no solamente a gana e competencia den Categoria All Aruban pero tambe a gana e Copa Rotativo di ASU ya cu esaki ta su di 4 aña tras di otro cu e ta gana e campeonato aki y awor e ta keda cu e copa aki den su poder, ademas el a pasa un examen cual a hibe awor na e grado di San Dan (di 3 dan) den Kendo, aki Sensei Sergio Velásquez a hasi entrega di e titulo di reconocemento di su grado nobo pa lo cual den nomber di henter miembronan di Bun Bu Itchi Kendo Aruba y Diario Deportivo, ta extende nos mas caluroso felicitacion pa e logro aki. Riba e combinacion di potret por aprecia algun imagen di e competencianan aki.