City Inspector Marlon Pieters ta bek riba caminda
ORANJESTAD(AAN): E decision a wordo tuma den Conseho di Minister, cu City Inspector Marlon Pieters lo ta bek riba caya.Relaciona cu esaki DIARIO a entrevista señor Pieters, kende a bisa cu e ta masha contento cu e decision aki, pasobra su anhelo semper tabata pa e duna un man pa hasi y tene Aruba limpi di berdad.El a bisa cu e ta premira cu ta bay tin algun proyecto den futuro, pasobra mirando e cantidad di sushedad, tin basta cos pa hasi. Tin hopi tipo di sushedad tambe, pues pesey mester traha diferente plan, unda cu mester sinta negocia cu diferente hende, incluyendo e diferente polisnan di bario y companianan di sushi.
Mester bay wak con pa tackle e sushedad y con lihe por bay hasie. City Inspector a splica cu tin un plan tambe pa fin di aña cu ta bay ta sea atende cu e sushedad den e barionan, of atende cu e autonan bieu cu ta para na varios caminda di nos isla.
For di awor Pieters a cuminza pidi tur hende pa yuda tene Aruba limpi, pasobra e pais aki no ta di un compania of gobierno, sino di nos tur.
Si tur hende percura pa tene nan cura, nan cas, banda y patras di nan cas limpi, esaki ta yuda hopi.
Pieters a bisa cu si bo bay laman, bo bay wak futbol of unda cu ta, por fabor percura pa bo piki e sushi, tira nan bek den bo auto of den un bari di sushi.
“Abo como persona tin e responsabilidad pa hasi y tene e isla aki limpi”, segun Pieters.
Segun e City Inspector, un sondeo a wordo hasi y e sondeo a mustra cu den cualkier hanchi cu bo drenta bo ta haya tur tipo di sushedad tira eybao y constantemente mester manda equiponan pa hasi limpi.
