Compromisonan haci den campaña birando hechonan concreto

Publication: Diasabra, 21 November 2009. Categoria: Politica

Door di Gabinete Mike Eman-1
ORANJESTAD (AAN) –“Pa nos ta hopi importante pa awe nos comparti un di e prome momentonan di e decision di e cambionan importante cu nos pais a scoge pe, dia 25 di September. Durante e ultimo simannan, nos a bin ta trahando hopi duro riba diferente di e puntonan importante pa cual nos comunidad a elegi e direccion nobo pa un cambio, pa locual ta trata maneho di nos pais”.
Asina aki Prome Minister mr. Mike Eman a expresa, ora el a habri e conferencia di prensa extraordinario ayera mainta, en conexion cu firmamento di e ley cu ta reduci BBO di 3% pa 1.5%, for di entrante 1 Januari 2010.

E dignatario a agrega cu un di e aspectonan hopi importante durante e ultimo añanan di discusion y debate publico tabata si Aruba por sigui riba e curso cu di un banda gobierno tabata keda aumenta su gastonan, pero di otro cada bez, pa medio di cambionan di leynan fiscal y den leynan cu ta trata primanan cu nos poblacion tin cu paga, y introduccion di leynan nobo cu constantemente tabata busca entrada pa tapa e buraconan cu tabata worde crea cu un maneho financiero economico, cu nos tabata considera iresponsable y sumamente penoso pa nos comunidad.

“ Y un di e leynan cu mas ta identifica e proceso doloroso aki, cu a bay na custia di nos comunidad ta e introduccion di e ley di BBO. BBO a worde introduci no pa haci cambionan fiscal manera gobierno a anuncia e tempo ey, pero el a worde introduci pa asina por tapa un buraco cu gobierno a crea, cu mal gastamento di placa, na custia di nos comunidad”, prome mandatario a acentua.

Minister mr. Mike Eman a acentua cu for di momento cu BBO a worde introduci, no por a mira den ningun di e presupuestonan cu despues a ser entrega na Parlamento, cu lo por tabata tin aumento den inversion den enseñanza, asistencia social, infrastructura, of edificionan di nos pais.

“ Simplemente e tabata pa sigui financia e gastonan cu a worde identifica como di ‘friends & family’. Esta, huurmento di edificionan, pagonan miyonario na oficinanan di abogado, promocionnan politico, mientras cu nos pueblo a sufri severamente cu hopi dolor pa cu e desaroyo aki”, el a remarca.

“ Durante di e proceso di cambio cu a cuminza prome cu eleccion”, mr. Eman a agrega, “y cu pueblo a bay caya pa bisa cu mester cambia e direccion aki, AVP a sinti cu Aruba kier a pone un punto tras di e desaroyo y maneho aki, cu a bay na custia di e poder di compra di nos ciudadanonan”.

“ E rapportnan cu nos a presenta y cu awor ta worde confirma door di estudionan nobo, ta mustra cu durante e ultimo ocho añanan 20% den nan poder di compra, si nos tume como average, pasobra tin gruponan di menos recurso cu a perde casi 30% di nan poder di compra for di e maneho cu continuamente a busca entrada for di e saco di nos conciudadanonan”, Premier a subraya.

El a enfatiza cu su gobierno a haci un compromiso cu nos comunidad, cu di momento cu Aruba scoge pa un cambio, esaki lo worde introduci riba tur tereno cu por trece alivio den nos comunidad, y cu por inverti den e poder di compra di nos hendenan, ta solidario cu esnan di menos recurso, y cuminza inverti den nos pais y den renovacion di nos infrastructura y enseñanza, y un speranza nobo pa nos pais.