Contesta na su Abogadonan: Marisol mester ta tras di trali!!!
ORANJESTAD (AAN): E abogadonan di Marisol Lopez Tromp a manda DIARIO un carta cu e peticion pa e Matutino di Aruba rectifica y declara cu Marisol no ta corupto y no ta ladron.
Kizas e abogadonan tin razon pasobra den e articulonan cu nan ta cita DIARIO ta yama Marisol corupto y esaki por ta no ta un bon descripcion di e barbaridadnan cu Marisol a comete! Por ta cu Marisol ta exigi pa nos dune mas honor y no yama loke el a haci ‘corupcion’ so pasobra e berdad ta cu loke el a haci no ta un corupcion di tur dia!
Su corupcion ta un corupcion hopi avanza, un corupcion hopi adelanta compara cu e corupcionnan simple di su coleganan. Pa esaki nos ta disculpa nos mes. Nos por imagina nos cu ora Marisol a yega na un nivel asina halto di nepotismo, no ta corecto pa djis yame corupto.
Ta solamente pasobra no tin un palabra ainda existente pa describi e actonan bochornoso di Marisol nos a usa e palabra ordinario di corupcion. Pero ningun momento DIARIO ta di opinion cu loke DIARIO a publica no ta cay bao di e termino di corupcion y si Marisol kier discuti esaki dilanti di Huez, DIARIO ta completamente dispuesto pa haci esaki. Pesey DIARIO ta ripiti en corto loke a worde skirbi.
Marisol tabata envolvi den e benta di casnan na Lago Colony. E bendedornan a bisa e cumpradornan cu nan por ta sigur di e compra pasobra ta Marisol mes ta envolvi. E testigonan aki a declara esaki dilanti LandsRecherche.
Esaki ta un di e tanto casonan, pero dilanti di Huez DIARIO lo trece tur cu e tin. Tin un set di terenonan cu Marisol a duna Maurice Neme cu berdad no ta corupcion normal pero corupcion di nivel haltisimo y probablemente di sumanan barbaro.
Marisol a duna un di su trahadornan un tereno miyonario pa traha un proyecto di miyones mientras e trahador aki no tin moda di muri di pobreza. Marisol a ricibi un miyon Florin di un compania di Curaçao cu tin e mesun director di un otro compania cu a haya un tereno grandisimo di Marisol.
Esakinan ta solamente un par di e casonan cu Marisol a dirigi. Cu placer DIARIO lo para dilanti di nos Hueznan y mustra cu DIARIO como un corant consciente di su obligacionnan pa cu nos pueblo a studia tur loke Marisol a haci y cu conviccion a publica esakinan.
Tin biaha nos mes a sinti cu nos no tabata tin palabra suficiente bon pa mustra pueblo loke Marisol tabata haci.
Ora Marisol como Ministro por dicidi di bay construi un brug pa 600.000 Florin mientras e brug aki no tabata planea ningun momento, ta con e kier pa nos yama e acto vandalico ey? E construccion di e brug aki no tabata riba presupuesto.
E brug a worde construi sin cu tabatin un destaho publico. E brug aki a worde construi pa un suma mucho halto. E brug aki a worde construi solamente pa facilita Marisol y su famianan acceso na nan propiedadnan.
Esaki no ta corupcion di tur dia pero ta parti di actoan criminal cu no tin palabra drechi pa nan ainda. E no ta hortamento ordinario tampoco. E ta un hortamento di placa di pueblo pa propio interes cu no por worde yama un ladronicia di tur dia. E ta un hortamento di nivel halto. Pesey cu tur placer nos lo trata di mustra Huez kico nos tabata kier meen.
Nos opinion ta cu si nos tabatin un Ministerio Publico imparcial, Marisol lo tabata na KIA tras di trali. Por ta cu dilanti e Huez di casonan civil nos por yega cu Marisol lo worde persigui manera mester ta.
Pesey e contesta na e abogadonan di Marisol ta: ban topa otro dilanti mesa berde y trata e casonan di Marisol te den detaye. Ya cu nos procurador general ainda no tin ningun intencion di haci algo, ban mira con e ta bay dilanti mesa berde di e Huez civil!
Tromp Marina
Nada mas pa agrega, e contesta ta na su lugar.