Home General Curacao tin admision liber pa ciudadanonan di Reino y tin Arubianonan a...

Curacao tin admision liber pa ciudadanonan di Reino y tin Arubianonan a bay traha aya caba

2
2
SHARE
- Advertisement -

Presidente di KvK, Edwiu Roos no ta mira motibo di miedo:
ORANJESTAD (AAN) – DIARIO a entrevista señor Edwin Roos, presidente di Camara di Comercio y Industria, tocante e ley yama “Rijkswet Personnen Verkeer” (Admision liber) pa ciudadanonan di Reino Hulandes y Mericanonan, cual ta conta cu e sosten di KvK. E ley aki a haya critica di e lider di fraccion di PDR den Parlamento, mr. Andin Bikker, ken, por cierto, a haci un yamado publicamente na KvK, pa reconsidera su posicion. Su punto di bista ta cu e ley ta habri caminda hancho, pa Hulandesnan di otro partinan di Reino Hulandes y tambe e Mericanonan, por bin establece na Aruba facilmente.
Bikker ta propone un referendum prome cu pasa e ley aki pa asina nos pueblo mes dicidi.
Señor Edwin Roos a menciona cu pa hopi aña caba KvK ta boga pa e transito liber di ciudadanonan cu passport Hulandes dentro di Reino, como parti di un di e filosofianan mas importante cu Camara tin, cu ta igualdad y libertad pa haci negoshi, pero tambe riba derecho di establece.

Presidente di KvK a subraya cu no mester confundi e hecho cu nan ta pro transito liber di hendenan den Reino, cu nan ta pro e ley, pasobra nan no a profundiza ainda den tur e articulonan cu tin den dje, y aparentemente tin cierto politiconan cu ta haya cu e ley tin cierto articulonan cu ta na desventaha di Aruba.

E ta kere cu esey, naturalmente, no mester ta den e ley. Pero e no ta kita afo cu e miedo cu ta worde crea cu un cantidad di Hulandes Europeo of kizas di Antiyano lo basha bin Aruba, esey no ta algo cu mester teme.

Na prome lugar pasobra Aruba su mercado laboral ta limita, y e tipo di trabao cu nos Isla ta ofrece, gran parti ta den nivelnan mas abao y KvK no ta kere cu hendenan di otro partinan di Reino ta interesa pa bin haci e trabaonan aki.

Roos no ta kere cu esaki ta den conflicto cu “carring capacity” cu KvK tanto ta papia di dje, pasobra e ta convenci cu no ta un cantidad grandi di hende lo kier bin biba na Aruba.
El a splica cu na Curacao, pa basta aña caba, nan tin e maneho cu si un Hulandes tin un trabao y tin vivienda nan por establece den e Isla y nan no tin problema cu nan falta hende. Ainda por haya basta trabao aya y hasta, recientemente, diferente hende di Aruba a kita di nan trabao pa bay traha na Curacao.

Segun Roos esaki mas bien lo beneficia e mercado laboral di Aruba, y tambe pa cierto cuponan di trabao cu aworaki ta dificil pa haya hende, nos por busca trahador mas cerca. Actualmente, hendenan di otro nacionalidad y culturanan ta bin traha na Aruba, mientras cu den otro partinan di Reino tin cu por haci e trabaonan aki, pero solamente pa motibo cu nan tin cu pasa den tramite y procesonan largo pa haya permiso pa establece y cu tur aña mester renova, pa nan ta un molester cu no mester tin.

- Advertisement -

2 COMMENTS

  1. Bikker ta propone un referendum prome cu pasa e ley aki pa asina nos pueblo mes dicidi.

    Claro un referendum prome cu pasa e ley aki pa asina nos pueblo mes dicidi.

    Si un referendum prome cu pasa e ley aki pa asina nos pueblo mes dicidi.

    Admishion LIBER no, Referendum SI, Admishion LIBER no, Referendum SI

  2. Mi ta kere cu prome cu tuma un paso cu hopi riesgo asinaki mester wak kiko ta sosode ja kaba ariba mercado laboral. Si bo wak sierto restaurantnan ta Hulandes so ta traha. Zogenaamd stage. Esaki ta sosode tambe den sierto companianan cu NO ta pidi permiso pa e personan aki ja cu tin Arubiano pa hasi e trabow y toch tin hopi Hulandes den servicio. Esaki ta sosode den beveiliging y sierto otro compania. Pakiko KVK, cu tin cu duna gua, no ta actua y splika e empresarionan aki cu nan ta perhudicando Aruba? Si e ley ey bini anto nos muchanan cu caba EPB y EPI tin cu bai buska trabow afo.

DUNA COMENTARIO

Please enter your comment!
Please enter your name here