DIARIO ta insisti… Caso di Marisol mester bay dilanti di Huez!
ORANJESTAD(AAN): Mas nos pensa riba e carta di e abogadonan di Marisol, mas nos ta kere cu Marisol lo haci Aruba un fabor grandi door di hiba DIARIO dilanti di Huez. Pa bienestar di nos Estado di Derecho, un caso caminda tur e actonan coruptivo di Marisol lo worde trata te den profundidad lo aclaria hopi. Ni cuanto DIARIO a bin cu pruebanan di e corupcion di Marisol, Ministerio Publico a bira cara y a haci nada. LandsRecherche a lanta e impresion total cu nan interes ta pa tene e criminalnan di MEP for di prison y trata di tur manera cera e politiconan cu ta contra di MEP. Pesey un caso di Marisol dilanti Huez lo duna DIARIO e oportunidad di mustra Huez ampliamente kico Marisol a haci cu propiedadnan valioso di pueblo y con el a gasta sumanan grandisimo pa favorece su mes y su familiarnan.
Ta logico cu DIARIO ta contento cu e investigacion cu gobierno di Hulanda ta bay haci encuanto e ex-gobernantenan di MEP y nos tin tur confianza cu e investigacion aki lo trece un cantidad di crimen cu nos mes no tabata sa di nan riba mesa. Esaki no ta kita afo cu tin di e crimennnan cometi door di e Ministronan di MEP cu no mester di ningun investigacion preliminario pasobra tur e hechonan ta conoci y solamente ta exigi di Ministerio Publico of di polis pa cuminza e investigacionnan.
No tin mester di warda cu e investigacionnan aki. E teoria di Ministerio Publico cu, por ehempel, den e caso cu Marisol a construi e brug pa yega na e tereno di su ruman muhe y di resto di famia a worde aproba despues door di Staten, y door di esey Marisol no ta castigabel penalmente no ta corecto. Pasobra esaki lo kier meen cu un Ministro por a comete cualkier crimen y laga e 11 marionetanan di MEP den Staten dune aprobacion cu nan mayoria! Ta ki clase di argumento esaki ta?
E servicio di siguridad di Hulanda cu a haci un investigacion caba riba e corupcion di e gobierno di MEP a yega na e conclusion cu un di e problemanan mas grandi cu Aruba tin ta cu e Procurador General ta cana na man di MEP. Pasobra si Ministerio Publico a actua manera mester ta hopi di e crimennan di e gobernantenan di MEP a worde investiga y castiga. Door di esaki e Ministronan di MEP a stop nan corupcion hopi tempo pasa caba.
Ta pesey mes DIARIO ta kere cu un caso dilanti Huez entama door di Marisol lo duna nos Estado di Derecho un empuhe positivo. Ora DIARIO caba di prueba dilanti di e Huez di casonan civil con corupto Marisol tabata, esaki ta pone un obligacion riba e Procurador General di persigui Marisol of tuma su retiro. E ora no ta oposicion of DIARIO a acusa Marisol di e corupcion grandi, pero ta Huez a dicidi cu berdad loke Marisol a haci ta corupcion di alto grado y esey lo mustra cu e ex-ministro aki mester worde persigui penalmente.
E casonan di Sero Colorado, di Maurice Neme y su yiunan, di su empleado, di e miyon di Curaçao, di e brug pa e tereno di su ruman y tanto mas lo mustra Huez cu loke Marisol a haci durante e añanan ta e corupcion di pio cu por tin y cu aparentemente esaki ta e diploma cu mester den MEP pa conta como lider grandi.
E cultura di MEP bao di Nel Oduber ta corupcion y ladronicia, y ta gracias na e maldadnan aki e dirigentenan di MEP ta cualifica. Si esaki no tabata e caso, Marisol a worde saca for di partido pa no mancha nomber di MEP mas cu e tabata mancha caba.
