Durante misa di Aurora lo tin un colecta special pa mantencion di edificio y structuranan di misa Catolico
ORANJESTAD (AAN): Durante un entrevista cu Monsenor Luis Secco el a duna di conoce cu durante 2008, den cuadro di 50 aniversario di Obispado y di e Diocesis, a pone un conferencia grandi cu participacion di tur seis isla. E mes a bishita e seis islanan cu un pre-conferencia cu a dura dos of tres dia den cada isla. For di eynan a sali un documento cu yama “Mision 2009-2011”, a indica.
Awor ta bay drenta e di dos aña di e mision y ayera mes na Dia di Cristo Rey, na Parokia Cristo Rey na Brazil, el a entrega un mensahe, un buki cu un poster cu ta pone tur e metanan pastoral pa e aña aki, a manifesta.
Monsenor Secco tambe a manifesta cu tin cinco area grandi di nan Plan Pastoral. Nan tin e area di Union y Comunion, Evangelizacion, Formacion di Muchanan na School y famia. Tambe tin e area di Structura caminda kier drecha tur locual ta pertenece na iglesia cu a ser ricibi como herencia. Tin e area di Liturgia cu tin di haber con nan ta celebra Misa y tur loke esey ta encera.
Pa loke ta e situacion financiero di Iglesia Catolico, Mgr. Secco a expresa cu esaki a baha e ultimo añanan.
Aruba ta un di e islanan cu ta coopera mas tanto den e sosten di e Diocesis pero no por pensa cu e fondonan di Aruba ta bayendo otro isla, a bisa.
Tin un colaboracion cu nan tin cu mande Roma. Tin colectanan durante e aña cu nan tin cu mande na e Nuncio na Trinidad pa obranan mundial ya cu tin iglesianan mas pober manera na Africa y Asia, a indica.
Banda di esaki Mgr Secco a sigui bisa cu nan ta solidario cu otro paisnan di mundo y tambe e fondonan cu nan ta ricibi di Aruba, Corsow, Bonaire, etc, ta pa mantencion en general.
Dia 23 di December durante Misa di Aurora lo tin un colecta special a mantencion di tur e edificionan y structura di Misa Catolico.
Den e parti ey Diocesis a pone hopi enfasis na Aruba y na tur e otro islanan pa cuminza cu drechamento di santana. A agrega cu nan a mira cu hopi comision cu tabata percura pa mantene santana no a logra, no pa falta di interes, pero tambe pasobra tin limitenan.
A añadi cu hende a bira grandi of e comision a bira bieu y mester renoba e parti ey.
E ta kere cu ta importante pa tur hende sa cu e cen cu nan ta ricibi no ta bay den saco di Pastor. A expresa cu Pastor tin su sueldo. Gobierno ta paga un sacerdote como un ambtenaar pa yuda su mes. Tur cen cu ta drenta pa parokia manera colectnan ta bay pa drechamento, mantencion di edificionan. E aña aki nan a pone hopi enfasis pa mehora e santananan, a reitera.
