Home Editorial E INVESTIGACION “CIENTIFICO” DI HULANDA TA INACEPTABLE!

E INVESTIGACION “CIENTIFICO” DI HULANDA TA INACEPTABLE!

2
4
SHARE
- Advertisement -

jossy_mansur_pic           Ta bon pa Hulanda compronde cu un investigacion “cientifico” no ta sirbi e proposito di comproba tur e corupcionnan cu e malandronan di MEP den e Gobierno cu Pueblo a caba di manda cas a comete, y persegui nan penalmente pa e abusonan cu e placa y e propiedadnan di Pueblo. Mi ta spera cu loke Hulanda ta buscando no ta un “labamento di man” a-la-Pontius Pilatus!

 

            Si e investigacion ta uno “cientifico” e no tin ningun peso pasobra e ta bay exonera esnan cu durante 8 aña a malusa nan puestonan di poder pa yena e saconan di nan mes, nan famianan y amigonan, y pa persegui sin clemencia tur esnan cu tabata opone nan fechorianan. Corupcion? Ta ki clase di investigacion “cientifico” tin mester pa determina si el a ser cometi? Nos no mester di nada “cientifico” pa comproba su existencia!

            Gabinete Mike Eman 1 mester a rechaza e proposicion di Hulanda di biaha, manera Mike a haci caba den un principio, pasobra e no ta loke e Pueblo votador a exigi di e Gobierno cu lo sinta despues di e Gobierno di famia y amigonan di un MEP degenera pa su propio liderazgo. Ningun di nos ta bay keda braza cruza pa un proposicion cu tin como obhetivo exonera e malandronan di MEP di loke nan a comete contra Ley durante nan estadia como gobernante, cu e excusa cu di awor padilanti si ta bay aplica loke ta necesario na e Gobernantenan nobo. E poder tey pa haci bon, no malo; pa bin cu claridad, no subterfugio; pa demostra honestidad, no ladronicia; pa traha pa e bienestar di Pueblo, no malgasta su placa y regala su propiedadnan na compinchinan!

            Kier meen anto cu den e “investigacion cientifico” ey e brug di madushi lo keda como un “eror comprendible y perdonable” di Marisol; cu e compincheria cu su financiadornan ta simplemente “e devolucion di fabornan pa placa inverti”; e asunto di dump “algo cu a djis pasa y no mester ripiti”; cu e nepotismo di Nel y otronan ta aceptable pero no castigable; cu e ladronicianan na laboratorio, utilities, y tanto otronan ta destina pa olvido; enfin, cu tur loke a ser comproba como actonan di corupcion cu documentonan irefutable ta bay sirbi djis como ehemplonan di loke no mester bolbe pasa. Osea cu e intencion lo ta pa djis cumpli cu e dicho popular na Spaño: “borrón y cuenta nueva”! No, e no ta aceptable bao di ningun condicion o splicacion dorna cu suco!

            Si Hulanda kier spanta pa e palabra ridiculo “recolonizacion” di Booshi, cu no tin ni contenido ni hustificacion den hechonan real, o pa e gritonan bashi di “independencia” di Rudy, cu ningun di nos ta comparti, o no kier ser tilda di ta un pais colonialista, e dal bay, pero no riba nos custia! Loke Gabinete Mike Eman 1 mester haci awor ta bin cu su propio investigacion, amen di si e P.G. ta politicamente comprometi o no, of no kier duna su apoyo, pasobra esey no tin ningun validez contra e boluntad masal di Pueblo. Ta e tin e poder no e P.G., ni otronan cu por a laga nan mes ser mal usa pa interesnan politico. Si ta necesario nos lo bin cu un accion di firma pa derota e intencion di un investigacion cientifico!

Permitimi haci un proposicion concreto y contrario:

            Si Hulanda no kier haci un investigacion manera debe ser, cu determinacion di culpa y su consiguiente castigo, anto: establece un “Comision di Investigacion” local cu tin e autorizacion pa interoga esnan cu por aporta detayenan concreto; cu tin acceso na e archivonan di e departamentonan concerni pa revisa tur e documentonan cu no a bay para den shredder o ta existi ainda scondi den algun computer; y conta cu e respaldo di nos Leynan. Su integrantenan mester bin di e cuerponan di investigacion cu ta existi na Aruba, manera RST, Cuerpo Policial, Recherche, Duane Recherche, Seguridad Nacional, pa djis menciona algun cu tin e personal califica legalmente pa haci e trabao. Un cos ta sigur: nos no por cera wowo pa tur e bagamunderianan cometi cu alevosia contra e interesnan di nos isla y nos Pueblo, djis pa complace Hulanda y mantene aleha di e palabra aparentemente fastioso pe “colonialista”. E no tin ningun hustificacion posible!

          Hulanda di su parti no por sigui bira lomba pa un pasado cu tey, cu a existi pero cu no por resucita. E no mester sconde tras di e pantaya absurdo ey pa nenga Aruba un investigacion necesario, cu lo mester desemboca den loke nan mes ta yama “straf vervolging”! Si no ta asina, anto Gabinete Mike Eman 1 por dal bay y imita MEP den tur su bagamunderianan, a sabiendas cu Hulanda na ultimo hora lo hinca man pa salba e tambe di cualke persecucion legal cu otro “estudio cientifico” si e yega di comete e barbaridadnan cu e gobernantenan di MEP a comete! Ta kico Aruba o Pueblo Arubiano tin di gana cu tur e “ciencia” ey?

- Advertisement -

4 COMMENTS

  1. Tin comentarionan ta bisa cu si Hulanda investiga algo, yen di pisca gordo macamba ta bay sera. Un “chantaje” cu diske hendenan di MEP ta los’e si Hulanda ta purba investiganan. Ta berdad? Hulanda y e MEP’istanan so sa si ta berdad.
    Un cos ta sigur… Hulanda tur ora ta purba mantene e “bon imagen” (politico) humanista y bondadoso cu tin caba den e mundo aki; y un escandalo di mafiosonan macamba (si tin) no ta combininan, ya cu e “bon imagen” cu nan tin por wordo perhudica.
    Independiente di esaki, Gabinete Mike Eman I, cu ayudo (of sin ayudo) di Hulanda mester bin cu un investigacion formal ariba tur e casonan cu mas stof a lanta, cu tur e casonan di ladronicia, nepotismo y corrupcion cu a wordo cometi den e gobierno anterior; eliminacion y destruccion di patrimonio di pueblo
    Ta pueblo ta exigi di e gobierno nobo un Husticia Social.

  2. Ami no ta kansa ni stop di gradici Dios, cu señor Diario-Aruba/Internashonal tei!!!

    “straf vervolging”! Si no ta asina, anto Gabinete Mike Eman 1 dal bay y imita MEP den tur su bagamunderianan, TOCH Hulanda na ultimo hora lo hinca man pa salba bo di cualke persecucion legal cu otro “estudio cientifico”

    Experencia i Documentonan cu ami tin di e Hulandesnan, A SIÑAMI: Cu Diablo no por lanta contra Diabel pasobra ta contra su mes Reino e ta LANTA. ADEMAS MANNAN SUSHI “NO POR” HASI NADA CU TA SUSHI LIMPI.

    Corrupshon no a cumnisa na Aruba, CORRUPSHON a jega ARUBA for di Madre Patria Hulanda!!!

  3. Fck Holanda, Investigaion mester bin pasobra ta Holandesnan ta inventor di Corrupcion pesei nan kier haci INVESTIGACION “CIENTIFICO” pa perfecciona Corrupcion y sigui cu nan robo CIENTIFICO.

    Aruba ta un Paraiso y merece lo mejor, un Gobierno sano recto y correcto cu por defende su Pueblo haciendo un Investicion cu mandato di e Pueblo cu a bute einan.

  4. Si por cientifico nos ta comprendé e método pa llega na una conclución verdadero, ta aplicable pa evalua tur actividad humano. En todo caso e corrución ta e cancer mas grave di un democracia, cu por caba cu e moral y economia di un pueblo. E educación cu e valor di e bien comun ta su remedi structural y su tratamento mester ta e investigación y castigo ejemplar.
    Corrupción ta e denominador comun di e paisenan den desarollo cu a conducí nan a e miseria económico y moral a pesar di nan riqueza natural.

DUNA COMENTARIO

Please enter your comment!
Please enter your name here