Diario Online

E Parlamentaria yen fanfaria mes tabata ausente na reunion di Parlamento

Publication: Friday, 27 November 2009. Categoria: General

Reunion cu Fraccion di M.E.P. mes a pidi pa yama den Parlamento
Pa trata supuesto trapamento di “Trias Politica” den un reunion pubico
ORANJESTAD (AAN): Diahuebs ultimo tawatin un reunion publico cu a worde yama pa e fraccion di M.E.P. cu karakter di urgencia paso segun e fraccion minoritario den parlamento e Minister Di Husticia Arthur Dowers a mete den Poder Judicial mandando un carta pa corte pa para tur casonan di LAR den corte poniendo asina nos estado di derecho na peliger y na nan opinion e ministro di Husticia lo mester bin responsabilisa su mes den parlamento!

Segun Parlamentaria Clarisca Velasquez, nan por a constata cu Partido M.E.P. tawatin asina tanto urgencia y interes partidista pa haci politica cu un topico asina delicado a bin mal usa Parlamento pa metanan netamente politico anto e parlamentaria cu a cuminsa cu tur e fanfaria aki pa defende ‘ Pater Familias’ a sali na defensa di e miyones cu e bufete di abogado cu su tata ta gana a briya cu su ausencia den parlamento.

E no a duna cara pa asina duna e berdadero motibo pakico el a bay haci denuncia falso cu e minister di husticia lo ta mete den poder judicial. E lo ta di biahe pa Thanksgiving y cu su mesun colega cu ta lider di fraccion a insinua cu e tambe lo ta djodjo cu placa di pueblo afo!
Tur e denuncia cu e fraccion di M.E.P. a haci tabata uno falso ja cu e minister di husticia correctamente a aclaria tur loke M.E.P. no a comprende y tur malentendido cu por tawatin.

Minister Arthur Dowers a splica parlamento cu el a manda un carta pa corte di Husticia den nomber di gobierno como partido cu un peticion pa pospone tur e casonan cu tin cu worde trata den corte proximamente ja cu e no tin bista riba e abogadonan cu ta representa gobierno den e casonan y cu tin abogadonan no ta suministrando gobierno informacion cu e mester y cu tin abogadonan cu no lo representa gobierno mas den e casonan.

Miembro di fraccion di Democracia Real Andin Bikker correctamente a splica como abogado cu ta haci e trabao aki diariamente na corte cu e proceder di minister di Husticia no ta impugna cu ‘trias politica’ y cu ta solamente un peticion di gobierno como partido pa posponemento di casonan cu su abogadonan tin cu atende na corte y cu ademas e peticion a worde pidi carinjosamente!

Fraccion di A.V.P. ta kere cu haci denuncia di trapamento di nos estado di derecho ta un denuncia hopi serio y cu mester tin base pa haci esaki y no mester usa parlamento pa politikeria!
Parlamento mester worde respeta como organo mas halto di un estado di derecho y cu decisionnan politico ta worde tuma eyden na bienestar di nos pais y no manera e fraccion di M.E.P. a haci pa trata interes personal of interes di partido M.E.P.