Entrevista exclusivo con Juan Pablo Cabrera: “E Magnate di e Plumanan di Carnaval”

Publication: Wednesday, 4 November 2009. Categoria: Estilo y Eventos,General

plumas1ORANJESTAD (AAN) – DIARIO tin e honor di a entrevista e diseñador Juan Pablo Cabrera, conoci como “El magnate de las plumas”, ken ta na Aruba cu vacacion, y tambe pa contacto cu e diferente gruponan di carnaval, ya cu for di aña 1990 e ta colabora cu Aruba su carnaval, pa loke ta concerni diseño di pluma. Juan Pablo ta bin di un famia importador di pluma di paisnan manera Francia, New York y Miami. Nan ta stablece e compania yama “Boa Novel Elty Feather Corporation”, na Miami y nan compania tin 45 aña riba e mercado aki.


Juan Pablo a cuminza studiando musica na Merca, den e Conservatorio di New York y el a specializa su mes den musica moderno, balada pop. E ta cantante, compositor y guitarista.
“ Conoci artisticamente como Juan Pablo Niepo, mi tin un trayectoria musical di como diez aña y mi tin musica graba tanto riba long play como CD.

plumas2Mi musica a recore Mexico, Sudamerica, Spaña, Francia y Sudamerica, y mi a laga e musica un banda despues cu mi mama a fayece, pa tuma e negoshi over. Mi a refugia den e negoshi y practicamente a abandona e musica, den sentido cu mi ta grabando mas. Aunke tin hopi presion pa mi bolbe graba”, Juan Pablo a relata.

“ Mi ta cuminza promociona e empresa den diferente mercado y alavez crea diferente diseño. Mi a cuminza traha cu gruponan di carnaval den paisnan manera Brazil, Trinidad, Aruba, Curazao, Bonaire, Belice, Guatemala, Honduras, Costa Rica (Feria de las Luces), Panama (Carnaval Calle Arriba, Calle Abajo), New Orleans, Alemania, Hulanda, New York, Filadelfia, Canada, Venezuela (Carnavalnan di Maracaibo, Valencia, Margarita, Colombia (Carnaval di Barranquilla), etc)”, Juan Pablo a conta nos.

Den e paisnan aki Juan Pablo tin un trayectoria grandi, y forma parti di e Huradonan di seleccion di eventonan di carnaval, certamen di Belleza, manera Venezuela, Feria y Eventonan Campestre.
Pa loke ta trata carnaval, Juan Pablo a enfoca riba e diseño di pluma, cu ta algo masha interesante mes.

“ Hopi di e plumanan ta bin di Australia, pero tambe di India y gran cantidad ta bin di Merca. E plumanan ta di gai, Avestruz, Turkey, Pavo Real, Faisan, cu ta esnan di mas uza. Awendia ta prohibi pa uza pluma di Ave di Paraiso ni di Aguila ni Quetzal.

E plumanan ta wordo procesa cu un tecnologia hopi antiguo, nan ta wordo completamente limpia, y wordo pinta cu e colornan di fantasia. E magia cu mi tin ta cu mi ta haci e colornan maravilloso pa e fantasianan di carnaval, pero mi secretonan no por wordo divulga”.

Actualmente, e compania ta preparando su mes caba pa e carnavalnan cu ta bin di tur e gruponan cu ta mas of menos e mesun fechanan, esta e Carnavalnan di Februari 2010.

DIARIO a puntra Juan Pablo con e crisis financiero-economico mundial ta afectando e preparacion pa e carnavalnan di e proximo aña.

“ Si. El a afecta algun grupo, pero semper ta existi cu pa hopi depresion cu tin, e hendenan ta saca for di e poco placa cu nan tin pa diverti. Mi a keda sorprendi na Aruba mes, cuanto hende tabata para den rij den e tiendanan cu ta bende material pa disfraz, pa Halloween. Mi ta premira cu e hendenan semper ta bay busca nan placa pa participa den carnaval, pasobra esaki ta un forma tambe pa recrea y laga un banda e problemanan pa un rato”, Juan Pablo a comenta.

No obstante, e carnavalnan lo no ta mes luhoso cu den añanan anterior, pasobra por ripara cu e personanan ta busca material na costonan mas abao.

“ Mi lo percura pa baha e costonan pero manteniendo semper e luho y elegancia di carnaval, y pa tin opcion di uza e mesun plumanan sin nodi yega na costonan hopi excesivo”, Juan Pablo a subraya.

Pa conclui nos entrevista, Juan Pablo a señala cu no ta existi carnaval sin pluma, y carnavalnan ta bay sigui cu e mesun calidad y cu e vision di semper pa un carnaval ta mehor cu esun prome.
“ Pa mi participa den tur e carnavalnan aki, mas cu den sentido economico mi ta haciendo algo pa humanidad pa tur e paisnan, pasobra mi ta amante di sembra algo unda cu mi ta bay, pa e hubentud cu ta bin duna continuidad na e carnavalnan cu ta sigui.

Semper mi ta bisa cu carnaval ta duna bida y color na locual no tin. Pa mi ta bunita di mira con carnaval ta duna oportunidad na cada participante desaroya su mes como artista. Hendenan di cualkier edad ta saca nan maraviya di pa un dia, disfruta como artista den un escenario. Esaki ta e magia di carnaval!” Juan Pablo Cabrera a subraya.

Leave a Reply