Gobierno di MEP a nombra personanan cu no ta cualifica den diferente posicion y cu e minimo di rekisitonan
Minister Oduber ta confirma cu Glenny Tromp y Charles Oduber ta ser manda Aruba bek
ORANJESTAD (AAN): Nombracionnan den gobierno ta hopi limita den e lunanan nos dilanti segun minister Otmar Oduber. E mandatario a confirma cu Glenny Tromp y Charles Oduber ta ser manda Aruba pasobra na Aruba por haci mihor uso di nan. Semper tur hende por busca nan derecho. Ta di lamenta cu e gobierno cu a bay a manipula cu e hendenan aki dunando trabao unda no tin fondo y vacatura habri.
Den entrevista cu DIARIO el a bisa cu den casonan di Oficina di Turismo particularmente, ya cu nan tin hopi oficina den exterior, mester midi exactamente kico ta e productividad cu kier den e oficinanan aki y a base di esey cierto decisionnan a cay den Conseho di Ministro.
E personanan cu lo wordo kita no ta bay pa nomber sino pa e eficiencia y productividad.
El a confirma cu e nombernan menciona entre otro a wordo pidi pa bin bek Aruba. Tin mas responsabilidadnan cu nan por carga y cu ta yuda e maneho cu tin na e momentonan aki na Aruba.
Mescos a tuma lugar den otro departamentonan tambe manera DOPV, Cruise Tourism, Aruba Tourism Authority como tambe Departamento di Labor, a bisa.
Tur hende por busca nan derecho, a subraya. Den e caso aki lamentable ta cu e gobierno anterior a manipula hopi di e hendenan aki.
Den un periodo cu Gobierno di MEP tabata demisionario riba dje a haci nombracionnan pa posicionnan cu no tabata tin vakatura, contra deseo di e hefe di e departamentonan caminda cu no tabata tin fondonan disponible cu ta haci cu e minister ta bira personalmente responsable, a señala.
Mas leu ainda a nombra personanan cu no ta cualifica den diferente posicion manera cu e rekisitonan minimo ta pa e posicionnan ey, a manifesta.
A base di esey Gobierno a tuma e decisionnan aki a base di consehonan cu nan a haya di Departamento Huridico y Departamento di Finanzas como di departamentonan concerni, a expresa.
