Gobierno ta suspende dr Trevor van Gellecum director interino di departamento di salud publico
Investigacion riba su maneho a cuminza…
ORANJESTAD (AAN): Tin un investigacion interno andando na Departamento di Salubridad Publico relaciona cu e posicion huridico di dr. Trevor van Gellecum. E ultimo aki ta na Hulanda siguiendo un estudio, pero tabata te cu recien director interino di tres diferente departamento di Gobierno y cobrando salario na por lo menos dos di nan. Dr. Trevor van Gellecum tabata encarga cu e maneho diario di Departamento di Salubridad Publico, cu e departamento di Inspeccion (cu mester controla Salubridad Publico) y cu e proyecto di IMSAN na San Nicolas.
Kico ta e motibo cu a suspende y a prohibi’e entrada den tur departamento di Salubridad Publico no ta bon conoci pa nos ainda. Parce cu su casa tambe tin un posicion halto como su suplente na un di e departamentonan cu Dr Trevor van Gellecum ta encabeza. Esaki ta sona hopi na conflicto di interes.
E investigacion lo mustra con bon e director aki a hiba su maneho cu e cantidad di pechi y controlando su mes den cada departamento cu e tabata encabeza.
Ora cu e noticia aki a sali mesora e director interino a yama for di Hulanda y busca contacto cu e gobierno nobo. E tabata casi roga pa atende e situacion na un otro forma.
