Homber Dominicano a uza identidad di Arubiano pa haya paspoort falso
El a haya castigo di 15 luna
ORANJESTAD(AAN): Recientemente Joan F.M.D di Republica Dominicana a presenta dilanti di huez, debi na e hecho cu el a wordo acusa di a hasi uso di paspoort falso y carchi di identidad falso, como tambe posesion di documento falso di declaracion di bon conducta y un ‘uitreksel di bevolking’, falso. El a wordo acusa tambe di exportacion di droga, como cu el a guli bolita.
Huez a trece dilanti cu e homber a wordo deteni na aeropuerto, pasobra su paspoort lo ta falso.
E paspoort berdad tabata falso.
El a pone su potret, pero el a uza datonan di un persona Arubiano. Ora el a wordo deteni, el a admiti tambe cu el a guli un cantidad di bolita.
En total e tabata tin 83 bolita den su tripanan, pa un total di 928,1 gram di cocaina.
E acusado a declara cerca polis cu un homber Colombiano a ofrece 4200 Euro pa e bay cu e droga pa Hulanda.
Pa loke ta e paspoort falso, e homber a splica cu e tabata biba na Corsow, pero e proceso pa e haya paspoort Hulandes lo dura mucho hopi y pesey el a dicidi di paga un persona Hulandes 4700 dollar pa e haya un paspoort.
El a bisa cu e homber a bin cu tur e documentonan pe na Corsow, incluyendo e papel di bon conducta, e uitreksel di bevolking y e paspoort y I.D falso.
Huez y fiscal a hasi e homber diferente pregunta, relaciona cu e hecho cu a ripara cu el a biaha pa Bonaire, St Maarten y Aruba.
E homber a declara tambe na corte cu su yiu na Santo Domingo tabata blo pidie pa e bay eynan, pa e por conoce, como cu e homber nunca a conoce e yiu.
El a bisa cu for di Corsow el a bin Aruba en vez di Santo Domingo, pasobra tabata mas barata.
E kier a busca un trabao.
Fiscal y huez tabata practicamente convenci cu e homber mes a bay bevolking di Aruba, pa regla e documentonan y el a keda para riba un no.
Huez sinembargo a mustre riba e hecho cu pa bo hasi peticion pa un paspoort, bo mes mester bay. Ademas di esaki den e paspoort tabata tin para su estatura cu ta 1 meter 55, pues esey ta un indicacion cu e mes a para eynan pa nan midie.
Record di aeropuerto ta mustra tambe cu Joan a bin Aruba riba 14 di Mei 2008 y a Sali bek dia 17. Dia 14 di Mei ta net e dia cu documentonan a wordo regla na censo, como tambe dia 15 di Mei.
E persona di cual e nomber y identidad a wordo horta, tambe tabata presente na corte y el a splica e problema cu el a haya su mes aden na aeropuerto un dia cu e mester a biaha pa Miami.
Nan a pare y interoge, pasobra pues tabata tin dos paspoort den circulacion cu mesun nomber.
Afortunadamente nan a haya sa na ora cu e tabata e persona original y asina e no a perde su buelo.
Fiscal a indica cu e no ta kere ningun parti di e storia di e acusado. El a bisa tambe cu Landsrecherche ta investigando profundamente con e asunto di regla e paspoort falso aki por a wordo logra asina facil.
Fiscal a bisa tambe cu e homber ta bisa cu su yiu kier wak e, pero si e homber kier a bay, e por a bay varios biaha cu e 4700 dollar cu el a paga pa e paspoort falso. Fiscal a exigi un castigo di 18 luna contra e acusado.
Huez a dicidi di dune un castigo di 15 luna.
Gor Rozenberg
Diario di Aruba permitimi duna mi opinion,tocante di e meneer Domininano aki,Juez di Aruba mester a deporte di biaha pa su Pais y pa e no drenta Aruba mas,e meneer aki a hasi su maldad,plus e ta hanja castigo di 18 luna den prison,gasto ta pa nos pagadornan di belasting,e pais no ta bai dilanti cu sorto di dilicuentenan aki.
Danki pa e espacio.