Hopi lesion grave den accidente di trafico por worde preveni
Segun enfermero di ambulance Rudgeri de Kort:
ORANJESTAD (AAN): Cu e cantidad di accidentenan di trafico ta alarmante pa un isla chikito manera Aruba, ta un simpel realidad.” Segun enfermero di ambulance, Rudgeri de Kort. “Regularmente tin momentonan cu nos servicionan di emergencia ta ocupa cu tres, cuater, te hasta cinco accidente pareeuw ariba e isla, sabiendo cu nos ta biba solamente cu 100.000 hende, lokual ta comparabel cu un pueblo chikito den cualkier pais bisinja.” Den hopi accidente, lesionan serio por worde evita door di tuma precaushonan relativamente simpel.
Seatbelt ta haci un gran diferencia: Un velocidad di 60 kilometer pa ora ta suficiente pa causa lesionan serio ora cu un auto tin un impacto cu un otro auto of objetonan manera palo di luz, mata of muraya. E forsanan cu ta bin liber den un impacto cu tal velocidad ta fuerte y ta haci cu nos no por evita di haya golpi.
Lamentablemente velocidad halto ta un problema hopi serio den trafico di Aruba y mayoria di autonan cu ta envolvi den un accidente cu herido, ta dal cu velocidadnan mucho mas halto cu 60. Den e casonan aki, seatbelt ta haci un diferencia grandi. Rudgeri de Kort:
“Ora personal di ambulance yega na e lugar di un accidente di auto, un di e prome cosnan cu nos kier sa ta si e seatbelt a worde uza. Esaki pa e simpel hecho cu sin seatbelt, e lesionan casi semper ta mas grave.” Hopi hende cu a uza nan seatbelt ta sali for di impactonan fuerte, cu lesionan leve manera kneuzing y spierverrekking.
“Mientras cu sin seatbelt nos ta wak mucho mas corta, sangramentonan interno, fracturanan y lesionan serio na bariga, pecho, nek, lomba, cara y cabez.” Ta net e partinan aki ta mas delicado y ta causa daño irreparable y te hasta morto.
De Kort ta sigui splica: “E seatbelt por nifica e diferencia entre un par di blauwe plek of kibra e windshield cu bo cabez. Peor: e por nifica e diferencia entre keda den bo stoel of worde saca violentemente for di e auto, muy en especial ora ta trata di boltermento.”
Velocidad halto: Cu un velocidad halto, tur cos por ta perfectamente bao di control, te ora cu mala suerte toca y sali un obstaculo dilanti di e auto. E tempo no ta duna pa stop e auto mes liher cu ta necesario y bo auto ta bira un machine potencialmente mortal.
Den caso di un impacto e “objeto” di menos peso lo haya mas daño, causando lesionan grave na otro. Ademas e “objeto” regularmente ta un peaton of personanan riba bicicleta of brommer, cu obviamente no por proteha nan mes di un auto pisa di metal cu ta dal nan cu velocidad halto.
Mas halto e velocidad ta den caso di un impacto, mas daño lo tin na e curpa di esnan cu ta envolvi. Den terminologia medico, cualkier impacto di 60 kilometer pa ora of mas ta worde categoriza como un impacto di “alto energia” cu ta hustifica lesionan cu no tur ora por worde mira di pafo manera fracturanan na e columna vertebral of sangramentonan interno.
Core na un velocidad responsabel y mantene suficiente distancia di otro autonan, di moda cu bo por stop na tempo si presenta un situashon imprevisto. Respeta limitenan di velocidad, especialmente na cruzada, den zonanan habita y den bocht .
Polis no ta inventa e reglanan aki pa prêt, nan tin motibo pa aplica limite di velocidad ariba e diferente tipo di careteranan na Aruba. Ademas, denuncia pustamento y pasamento di auto na un forma irresponsabel. Na Aruba, ya caba suficiente hende a haya nan morto inocentemente pa e tipo di actitud aki.
Buracheria den trafico: “Tur siman nos tin hendenan burachi den ambulance cu ta arepenti cu nan a causa un accidente bao influencia di alcohol.” Segun Rudgeri de Kort. “Tog hendenan di tur edad ta keda pensa cu nada lo pasa nan y cu nan ta apto pa stuur na un manera responsabel siendo bao di influensia.”
Boracheria y tambe uzo di droga y remedinan sedativo den trafico ta un problema serio na Aruba. De Kort: “Si e bida y salud di personanan inocente ey fo no ta bal suficiente pa bo keda sin tuma e riesgo di stuur bao influencia, anto pensa ariba con bo propio bida lo cambia ora cu un otro hende mester berde su bida of keda handicap paso bo a causa un accidente bao influencia di acohol of droga.” Tras di hopi accidente mortal na Aruba tabatin un chauffeur burachi.
Prome auxilio: Despues di un accidente, e cantidad di daño material ta bisa algo di e lesionan cu esnan envolvi por a recibi. Si tin hopi daño material, tin ora apesar di cu e ocupantenan no ta sinti mucho dolor, personal di ambulance lo opta pa move e victimanan cu precaushon for di nan posicion, y transporta nan uzando tecnicanan di imobilisacion te ora cu nan worde examina profundamente na hospital.
Pesey ta importante pa despues di un accidente e victimanan no sali for di e auto y cuminsa cana rond, pero keda caminda nan ta sin move mucho, sperando riba un ambulance. Eventual lesionan di lomba y nek por empeora inecesariamente y causa por ehempel cu e persona ta keda paraliza pa resto di su bida .
Tambe ta sumamente importante pa mirones y esnan cu yega na e lugar di e accidente no saca victimanan for di nan posicion sin mas, pero warda te ora cu profesionalnan di ambulance y brandweer yega na e lugar.
De Kort: “Por cierto nos ta ripara cu no ta tur hende tin pasenshi pa warda riba un ambulance y tin ora ta hinca victimanan di accidentenan serio den autonan particular pa hiba nan hospital. Esaki ta un practica sumamente riskante! Tin un diferencia grandi entre transporte cu un auto of cu un ambulance. Nos ta compronde cu tin ora ambulance por tarda pa yega, pero e cos mas responsabel pa haci ta pa warda y evita di haci mas daño.
