Accidente fatal ora S.U.V. a bolter y dal den alumno banda di caminda
ORANJESTAD (AAN): Trafico insigur a costa bida di un dama hoben riba Diabierna mainta. Esey despues cu un accidente lamentable a keda registra riba caminda di Oranjestad pa San Nicolas, na altura di Pos Chikito un tiki pariba di Oficina di Keuringslokaal di DTI. Un coresponsal di DIARIO cu pa casualidad ta yegando eynan pa baha su casa na e Bus-Stop panort di caminda, a mira tur cos cu a socede. E accidente a socede ora cu un dama coriendo un vehiculo tipo Compact-SUV, esta un Hyundai Tucson color blauw cu number A-40340, aparentemente cu tiki pura pa yega su destino na San Nicolas, saliendo di e rotonde di Pos Chikito direccion pariba, a purba su suerte di pasa un Ready-Mix Truck di ATCo na su banda drechi.
Pero aki e dos vianan for di rotonde ta finaliza, y ta uni den uno. Y como cu e Hyundai ta yegando su final di su via, y ainda no a logra pasa e Truck, e dama chofer a sigui cu speed, hasta baha di caminda banda drechi, y core riba acera y sigui cu su “inhaal”. Na ultimo momento, el a trata na subi bek riba caminda di asfalt.
Pero el a haci mal calculo, y pa su mala suerte, ora di drenta bek, el a haak na e front-bumper di e truck. Consecuentemente debi na e velocidad cu e tabata bayendo (pasobra e ta den proceso di ”inhaal”) su Hyundai a bay den un scual.
El a slip di banda, baha di caminda banda robez, dal riba un baranca, bolter, y dal riba un studiante femenino cu tabata para banda panort di caminda ta warda Bus. Algun otro studiante cu tabata eybanda ta wardando Bus, a logra bula un banda na tempo.
E impacto a socede asina rapido, te cu e mucha muher no a haya chens di reacciona mes. Despues di a dal den dje, e vehiculo a lastra e mucha ainda un tiki, y despues el a keda eybao. Testigonan a indica cu den e prome minuutnan ainda e tabata reacciona, cu hopi sanger na su cara. Pero despues el a stop di move.
E demas studiantenan cu ta para eybao (net den un tiki sombra), a bay den shock. Hendenan eybanda mesora a bati alarma, y diferente unidad di Polis, Ambulans, y Cuerpo di Bombero a acudi na e lugar. E Hyundai a keda cu su cuatro wielnan den halto, y personal di rescate mester a traha pa saca e dama chofer di eyden.
Despues cu el a worde libera, e dama chofer a worde transporta cu urgencia pa Servicio di Emergencia na Hospital, y su condicion ta stabil. E chofer tabatin uniform di un banco bisti, indicando cu e ta rumbo pa trabao.
Polis mientras tanto a cera e caminda, y a cuminza cu e investigacion. A entrevista tanto e chofer di e truck, como tambe diferente testigo cu a mira claramente kico a socede. Polis a desmenti na prensa, e rumor cu e studiante tabatin headphone bisti ta scuchando iPod, pero DIARIO tin potret na momento cu un oficial di Recherche ta confisca e Cellphone di e mucha muher, y na esaki tabatin headphones poni.
Testigonan a bisa cu tur mainta, e mucha muher ta para of sinta riba e pida baranca ta warda bus, y ta scucha musica cu e tin graba riba su mediaplayer di Cellular.
Acaso si acaso e no tabatin headphone na su orea, e lo por a salba su curpa? Expertonan ta duda, pasobra e accidente aki a socede den fraccion di seconde, y aki un ser humano no ta haya suficiente tempo pa bula of hala un banda.
E studiante mes ta biba na Sabana Basora, y su mayornan ta trahando den e supermercado net otro banda ey na Pos Chikito. Na prome instante nan no tabata sa mes cu nan yiu a haya su mes envolvi den e accidente, pero despues ora cu nan a haya sa, esaki tabata manera nan mundo a bin abao. Tanto e mama y tata a yega na e lugar, y e dolor fuerte cu a dal nan emocionalmente, a pone tur esnan presente eybao sinti un enorme tristeza.
Dr. Boderie a yega hopi rapido na e lugar, y a cuminza duna prome auxilio. Pero mucho no por a haci pa e mucha mas, y despues e mes a constata morto. Aurora Funeral Home a transporta e resto mortal pa mortuario.
E studiante a worde identifica como Pei Wen Zhang, naci na China dia 15 Juli 1989, pues e tin 20 aña di edad, y ta un alumno na Colegio Arubano. Despues di a finaliza St. Augustinus College MAVO, el a bay y sigui HAVO na Colegio Arubano.
Aña pasa e mucha muher aki a obtene su diploma di HAVO, y e aña aki e ta den VWO. E noticia di su morto a shock su klas V5-5, y henter e school tabata lamenta su morto den oranan di mainta. Maestronan na su honor, a hisa bandera half-stok y tur hende a tene un minuut di silencio. Colegio Arubano ta na luto, na honor di un studiante hopi keri.
Na famia di e fayecida, DIARIO ta extende su mas profundo palabra di condolencia. Un suplica na pueblo pa bay poco-poco e fin di siman aki. Mayoria hende nan cartera ta yen, y esey nifica cu trafico tambe lo ta hopi druk.
Junny Lopez
Kondolencia na famianan. Danki na Diario un biaha mas, pa boso raportahe kompleto. No manera e otro “amateurnan” cu ta djis pone potret y skibi kos chikito abow. Pa kolmo tin otro website cu no ta ni habri mes of ta sloooowww. Diario ta keda number un!!!!!!
plainjoe
Shonnan please ban poco poco riba caminda, e cos aki no por sigui pasa. Pavia di tin pura un victima inocente mester paga. Paga tino riba caminda, laga blackberry un banda y ban poco poco.
Zuleyma Mathilda
ki tristo ta cu pavia di corre inresponsabel y sin tino un ser humano inosente y cu ta bayendo pa sinja ta ser mata, mi ta pidi dios pa duna e famianan forsa ariba e momentonan aki please aruba ban corre responsabel y cuida nos personal y esnan cu ta nabanda wardando transportashon
Michael Pascoal
HOMBO E HENDE CU TABATA TIN APURO TA ECHT IDIOOT.. CORE POCO POCO NO??? DANKI NA DJE UN BIDA DI UN POBER MUCHAMUHE A SER KITA
CONDOLENCIA NA FAMIA Y AMIGONAN..
alicia
Hende inresponsabel ohm!! Pika swa..sey ta duele..mane ma tende tbt tin mas hnd para bandi e mucha muhe,dcn nan no a hale ora nan tur a hala?????? Loke a pasa lo keda den boso consenshi
alicia
Ultimamente ki ta pasando den boso mente??? Hendenan ban ta pensa prome cu subi caya,laga pura un banda,stop di pensa riba AMI i pensa riba NOS!! Mi ta desea boso hopi forsa den e momentonan dificil aki,I esaki ta bai pa esun di e hyundai Sigi hasi pura I wak kiko bo a ocaciona mata un ser cu tbt warda transport pa e por a bai su skol I sinja I wordo mata pa un buriko manera abo!
Sary Dekker
Como un amiga di Pei Wen,, mi kier bisa cu esaki a dal nos duro.. y ainda nos ta sperando cu nos ta lanta y hanja sa cu esaki no a sosede.. pero nos sa cu esey no ta bai pasa.. Rest In Piece Penguin.. We will never forget you!! Condolencia na e famia, y hopi forsa..
ale
kondolencia na e famia
alessandra
Kondolenica na e famia, Dios bendishona boso. Aruba asina nunka nos ta bay dilanti un mucha inosente cu ta wardando transportashon pa sinja! esun nan riba caja bay poco poco pasobra awor boso ta causa morto di un inosente
Kondolencia,
Amanda
mi ta hp srr pa Pei..e no ta feer pa djis un muje loco a mata un chik asina jong…:(
The Saint
Hallo na prome instancia mi kier a manda mi palabra di condlencia na familia di e defuntu aki i duna nan forsa den e dianan aki cu a bai laga nan den flor di bida. mi kier a bisa cu sin acaso e defuntu ta schucha su I pod no ta e ta culpable cu ela muri ta esun nan cu ta core hasi coi loco sin responsabel sin pensa cu tin mas hende ariba caminda!!!!! i un cos mi kier a bisa na e hende nan u ta busca hende cu a fallece den desgracia of natural pa sin nan por hasi e saki na un otro manera, manera na Hulanda nan tin un bus ( van ) preto of shinishi cu cortina i dos bandera dilanti cu bo por reconoce cu ta auto cu ta bin di busca un hende cu a caba di fallece pero no bai cu e auto cu nan ta husa tambe pa hiba un hende na su ultimo lugar di sosego pasobra,hende ta paga pa un entiero hopi placa i bo ta waak e mes un auto cu na ta husa tambe pa busca e hende nan aki, pasobra mi a waak den arant on nan ta bai busca un hende cu a caba di fallece te patras na e Noordkant di Aruba cu e auto fini nan aki. Mi ta kere cu sin nan usa un Van cu esaki ta mas respresentable i usa e auto fini nan aki solamente pa hiba e defuntu nan pa nan ultimo lugar.
Tromp Marina
Kondolencia na famia amigo y conocir nan.
Gobierno mester duna ordo pa revisa tur rijbewijs di 2002-2009, mirando e accidentenan mi ta kere ku ta hopi jabon Tide a wordo bendi.
maria
aki ta bay un msg pa alicia mi ta ful diacuerdo cu e accident ta fatal pero e otro muchanan no tin culpa nan a spanta mi kier men ta mucha nan ta y nan no a haya chens pa reaciona ta e senjora ta culpabel mi ta spera nan castigue danki
gladys tromp
CONDOLENCIA NA FAMIA
HENDENAN ASINA MESTER WORDU CASTIGA CON BO KIER BAI PASA UN AUTO NA BO BANDA DREACHA .TA KI SORTO DI RIJBEWIJS BO POR TIN.
UN INOCENTE TA PERDE SU BIDA INHUSTAMENTE.SENJORA NUNCA MAS LO BO DRUMI BON DEN BO BIDA
Nalda
Palabra di condolencia na famia di e defuntu ku a bai asina ranka na un edad joven pa un persona sin responsabilidad. Sali bo cas tempran pa bo jega trabow na tempo. Bo ta kore roekeloos manera ku kaminda ta di bo so. Minister di Husticia hasi algu. Bai ku man duro. Mester kita su rijbewijs. Chaffeur nan na Aruba ta core pa loko na Aruba. Bo tin miedo di kore auto. Mi ta kere ku ta den pakki TIDE nan a hanjele di regalo.
Joice
Kondolensia na famianan i amiginan. Ki dia nos pueblo ta kuminsa bira responsable i konsiente ki dolor nan ta kuasa na famianan, door di nan kondukta den trafiko. Tin ora ni nan mes nan ta hasi dano sino na otronan. Si bo ta laat bo tin bo celular jama bisa ku bo ta laat, pasobra ni maske kon duro bo kore ta laat bo ta toch, lanta trenpan pa bo sali na ora. Ora bo ta bebe no stuur of laga bebida den e boter si bo no sa kon pa use. Spaar bida di otro si bo no ke spaar bo mes un bida.
Nicodemus
Condolencia na e famia y amigonan dje difunto. Aruba mester bin cu un refreshment course pa esunnan cu a lubida of cu no a sina bon con pa core responsablemente riba caminda. Tin hende cu ta sali fo’i cas just for the fun of it, paso nan ta core entre 15-30 km/uur, y bo tin hendenan cu ta core >80km ta test drive nan auto. Si nos tur move with the normal flow of traffic riba caminda, cosnan lo bai ta differente.
E.B.
Na prome luga condolencia na famia y conocirnan di e fallecido. Shonnan ban sea conciente. Aruba no ta confiabel pa cana ni nada. Pls core mas responsabel.Ami mane un mucha di scol mes cu ta coi bus tur mainta, no por spera un cos asina. Si boso tin cu bai un caminda sali TREMPAN. No sali laat anto bo core cu full speed pa jega na ora.Si bo ta laat jama bisa cu bo ta jega laat. Paso asina boso ta causa Morto na hende nan inocente. Y pa e persona cu a causa un morto inocente mi ta spera bo consenshi keda traha riba bo pa otro biaha bo core mas RESPONSABEL.Aruba ban core trankilo!!!
rafael
mi ta bibando na ulanda y e pais aki ta hopi grandi.bin wak polis traha nan no ta pordona .conclushon con polis na aruba ta traha.e persona ei sigur no ta prome biaha e ta core asina pero niun polis lo ta einan pa dune su boet.ta asina bo ke sinja awo ta lat.
Big Eyes
Condolencia y hopi forsa na e famianan y amistadesnan di e defunto. Na e sra. cu a ocaciona e accidente, mi ta kere cu achteraf awor e lo ta realisa den kiko ela hanje pa motibo di su actuacion. E no a sali cas pensa cu awo eta bai mata un hende. Laga nos sinja di e fout di e sra. aki. Ser mas conciente di nos actuacion y velocidad. Miho 1 minuut laat cu nunca bo jega Trauma pa e chofer di e truck, pa e polisna y tur cu ta para ey rond. Forsa na boso tur y mi ta spera boso pidi ayudo di slachtoffer hulp.
elida
E noticia aki tawata fatal pa un I tur mi no por imagina con un conductor inresponsabel ta kita bida di un inocente den su pura pa jega su destino.
condolencia na famia Zhang i tur su amigonan i conosinan.
roz
Condolencia na e famia.Un noticia asina ta impacta tur hende y causa hopi tristesa pero tambe rabia. Na Merca prosecutor (corte) lo lanta un caso contra un chofer asina y nan ta wordo acusa di doodslag cu straf di prison pa 10-15 anja (cu ainda ta poco pa un famia cu perde nan ser keri inocente asina). Mi ta pensa cu un straf asina lo pone chofernan pensa prome cu haci maniobranan descabeya y causa morto di personanan inocente, lo cual ultimo anjanan ta sosode basta frecuente. Hopi tristo pa nos isla perde un hoben jong inteligente cu por tabata tin un bon futuro! Esaki ta sigur algo cu Parlamento mester traha riba dje, esta pa pone straf di prison halto pa tipo di cosnan asina!
Stan
Nos mester pone emphasis riba tur e rotundonan, pasobra ainan e hende cu hopi pura ta bira mas peligroso riba caminda, pasobra nan ta tuma e rotundonan como un logar unda nan tin chens pa sigui dilanti rapido si nan pasa e autonan riba bahn robez lubidando cu nan tambe mester tin mas cuidao. E authoridad mester cambia e pijl riba e bahn drechi pa bira drechi so anto evita e hende nan, cu ta pusta pa bai straight mas lihe, pa sigue riba e bahn drechi.
clinton
condolecia na e famia.
Libra_94
Condolencia na famia di P.Z.. Mi tambe ta un alumno di Colegio Arubano.. E noticia a impacta tur hende.. Mas su leerlingen di v5-5 .. Pavia un irresponsabilidad di un hende MAYOR.. ( ni di un hoben di un hende grandi paso bosa semper nan ta culpa nos hoben nan di tur cos malo ) un hende inocente a fayece.. Ora un cos ta pasando bo ta wory cu bo mes pa abo keda na bida depues bo ta wak pa e restonan pesey bo no por bay culpa e otro amiganan paso nan no por a yud.. Nos tur ta ser humano.. Mensen please ban core na drechi lemai biba pura paso bo ta muri pura tambe.. Condolencia atrobe..
baby girl
condolencia na famia
Hombo swaa!!!!!!!! no bisa bo no por a warda hello ta mainta trempan.Danki na dje un alumno inocente su bida e wordu kita pornada. Y danki na dje awo mama ta na yora mento
condolencia na famia un biaha mas
i feel it for you
baby girl
hende nan core bon riba e caminda awendia y pls tin pasenshi ora bota core pa asina bo no perde bo bida.
?
wak hnd nan bn stop di culpa hnd