Investigacion di bienestar lo duna un mihor bista ariba e situacion social di Aruba
Segun Minister Michelle Winklaar:
ORANJESTAD (AAN): Departamento di Asunto Social (DAS) ta anuncia cu durante 14 di November 2009 te cu 4 di December 2009 lo tene un investigacion di Bienestar Social den e comunidad di Aruba. Minister Michelle Winklaar a hiba palabra durante un conferencia di prensa convoca ayera y a manifesta cu a base di un peticion cu a worde haci door di e comision permanente di Staten di Bienestar General pa bin cu un investigacion riba e situacion social di nos pais, den cual nos actual Prome Minister Mike Eman, a pone hopi enfasis ariba e necesidad di un encuesta pa nos por haya un mihor bista ariba e situacion di pobreza y problemanan social.
E gobierno nobo ta contento pa nos por ta para na e inicio di e investigacion aki y pa por realiza no solamente e comienzo di e proyecto, pero tambe pa percura cu accion necesario lo worde tuma a base di e resultado di e investigacion, a bisa.
E maneho di e ministerio di Asuntonan Social ta trata entre otro na construi un sociedad caminda tur Arubiano por tin un bon calidad di bida den tur aspecto tanto riba tereno Spiritual, Social, Cultural y seguramemente laboral pa medio di un Gobernacion den forma responsabel cargando e responsabildadnan tambe, a manifesta.
E bienestar di un ciudadano ta e derecho basico di un pais avanza y e meta ta pa garantiza e derechonan humano aki.
Progreso ta algo relativamente simpel esta si bo keda haci algo mescos bo ta keda haya e mesun resultado. Esaki kiermen cu mester haci algo otro si kier logra otro resultado. Pa por haci algo otro y mihor mester tin na prome lugar un bista real di e situacion, segun e minister.
E mandatario a laga sa cu e investigacion di bienestar 2009 ta brinda nos e bista di kico ta comunidad su opinion tocante diferente topico relaciona cu bienestar. Alavez ta midi bienestar social di nos ciudadanonan relaciona cu trabao, vivienda, educacion y otro condicionnan di bida.
E resultadonan di e investigacion ta sirbi pa traha maneho y ahusta plannan di accion pa asina por brinda e sosten y ayudo na e comunidad di un forma mas efectivo. Di e forma aki ta activa e proceso di progreso cu cada un di nos aki na pais Aruba kier forma parti di dje, a agrega
Ministerio di Economia, Asunto Social y Cultura y Departamento di Asunto Social ta haci un apelacion na cada ciudadano cu worde acerca pa participa na e investigacion aki pa haci uso di e oportunidad y tambe forma parti e progreso di nos Pais dunando asina su colaboracion na un proyecto cu ta di suma importancia pa nos comunidad.
