Kendo Aruba lo tene Campeonato y Seminario e weekend aki
ORANJESTAD (AAN)— Luna di november ta e temporada di ASU Olimpiada. Tradicionalmente Bun Bu Itchi / Kendo Aruba ta participa cu hopi entusiasmo. E aña aki no solamente cu su Campeonato Arubano, sino tambe cu trainingnan extra (26 y 30 di november) y un seminario (diasabra 28) y examen pa graduacion den categoria kyu (principiante). Alrededor di 20 kendoka lo participa durante e fin di siman aki. Diasabra 28 lo cuminsa cu mil (1000) suburi (corte cu spada) non-stop. Despues di e warm-up aki e kendoka ta bon prepara pa ehecuta tur sorto di training basico.
Durante e di dos parti di e seminar, enfasis ta cay mas tanto riba tecnica y ehercicio di combate y competencia. E intencion ta pa prepara e kendoka física y mentalmente pa e Campeonato Arubano e siguiente dia.
Pa loke ta e Campeonato Arubano (diadomingo 29) ta Björn Brandts cu mester defende su titulo. Ta interesante pa wak si e talentonan nobo por reta e campeon reinante. Ultimamente su dominio tabata indisputabel, pero Eloy Arends, Angela Lie-A-Lien, Maggid Reátegui a train masha duro pa kita e trofeo for di man di Björn Brandts. Sin lubida riba ‘the dark horses’ Alejandro Castillo y Bas Ho-Kang-You.
Como shinpan (arbitro) y asistente durante e seminario, Kendo Aruba a invita Sr. Eddy Devisse (Trinidad & Tobago, 4-dan). Hunto cu Sra. Eun Jung Velásquez-Kim (Korea/Aruba, 5-dan Kendo, 2-dan Iaido) y Sergio Velásquez (Aruba, Renshi 6-dan) ta forma e trio di arbitrahe.
Durante e Campeonato tambe lo presenta un demostracion di e arte di spada IAIDO, pa Sra. Eun Jung Velásquez-Kim.
Bun Bu Itchi Kendo Aruba ta invita pueblo arubano pa bin wak nos hendenan train y bringa duro durante e dos dianan aki. Manera di costumber, entrada na Gymzaal di Juliana School ta gratis.
