Diario Online

MEP y su contradiccionnan!

Publication: Diasabra, 21 November 2009. Categoria: Editorial

            No ta pasa un dia cu e partido cu Nel Oduber a desgracia no ta pone su mes den un luz negativo, no pasobra e no sa miho, sino pasobra e kier presenta un imagen di inmaculado separando su mes completamente di e 8 añanan di corupcion, abuso, maluso di poder y desperdicio di e propiedadnan y placa di Pueblo. Un hazaña poco biaha rivaliza den nos historia politico! Bo mester ta basta kens pa kere cu tur otro hende ta bobo, y abo so un sabio!

            Lo ultimo ta e aremetida cu MEP a haci contra un di e personanan mas honesto y capacita cu mi conoce, o sea Arthur Dowers, e actual Ministro di Husticia. Acusando e di ta “mete” den Husticia, MEP no ta solamente comete e eror di tergiver-sacion intencional, sino alavez di kier pasa pa olvido tur loke su Ministro(nan) di Husticia a comete cu un arogancia increible, apoya pa un par di P.G. comprometi cu nan Gobierno y nan fechorianan.

            Pa cuminza, e asunto di Trias Politico ta algo na cual MEP no por acudi nunca, pasobra el a pone tur tres traspasa e frontera cu ta separa nan for di otro. E poder Legislative (Parlamento) nunca a funciona como tal, sino como un apendix di e Poder Ehecutivo (Gobierno), y a pasa pa historia como un organizacion di “ja knikkers” sumiso, cu no tabata por ni tabata kier a haci Gobierno respeta su independencia di accion y di pensamento. Pa tur loke Gobierno tabata desea, el a bay di acuerdo, y pa loke oposicion tabata enfoca, e tabata bira lomba. Ta ki clase di Trias Politico MEP tabata respeta? Pakico awor si, for di e bankinan di castigo na cual Pueblo a condena nan pa paga pa nan negligencia, nan arogancia y prepotencia, nan kier bin asumi e papel di santo? Por tin algun bobo perdi por ay, pero e mayoria absolute di nos Pueblo ta bon consciente di e 8 ananan di miseria na cual MEP a obliga nan! Nan memoria no ta cortico!

            Y pa loke ta trata e di tres poder, o sea esun Hudicial, y djis como un ehemplo, no ta e abogado estreya di MEP, Hendrik Croes mes a manda un carta directamente pa P.G. Theresa ordenando e pa persegui e ex mandatarionan di AVP? Esaki ta metemento directo den asuntonan di Husticia o no? No

ta e mes a interveni tambe directamente den e caso di violacion di Ramon, exigiendo e retiro di e denuncia di parti di e senora cu a ser abusa? Ta unda e fronteranan di Trias Politico a keda durante e 8 añanan di MEP?

            E partido geel nunca a respeta e independencia di e componentenan di Trias Politico y a obliga nan, cu nan accionnan descabeya y nan metementonan directo den cualke un di e trio ey, di cruza e lineanan separatorio di tal forma cu nan no por a fungi cu e autonomia necesario pa produci e beneficionan cu democracia ta brinda su ciudadanonan den forma di un garantiya imparcial di nan derechonan constitucional. Ta con un partido cu a duna un ehemplo asina lamentable di intromision directo por kere cu e ta den un posicion di mustra dede riba cualke otro?

            Pa loke ta trata e peticion of instruction pa un paro temporal di tur caso “cu tin di haber cu PERMISO” pendiente investigacionnan pertinente, mi no ta mira ningun motibo pa cues-tione di parti di ningun instancia, menos ainda di parti di un partido cu te recientemente tabata viola con cu e tabata kier, e prin-cipionan separador di e tres ramonan di poder publico. Tumando na cuenta tur e desastrenan cometi riba e tereno di permiso, y e negoshi grandi cu a ser haci cu nan pa yena e saconan di e miembronan di ‘friends and family’, un investigacion di tur e casonan pendiente ta urgente y na su lugar. Ta ki clase di “metemento” esaki ta? E ta, contrario na loke MEP ta pretende, un intento pa endereza asuntonan cu a bay for di man, y cu a convert! e stranheronan den e victimanan di instruccionnan y reglanan inhusto di parti di e Gobierno fatal di MEP. Ta ken por tin algo contra e intencion di un Gobierno, cua cu e ta, pa coregi loke ta fout a base di investigacionnan serio y al caso? Di trece husticia unda inhusticia tabata reina? Di trata e stranheronan por fin cu e debido respet y consideracion cu nan merece?

            Mi ta duda seriamente cu Arthur Dowers, siendo abogado, ta bay tuma un decision contrario na nos Leynan, y en especial, violatorio di e independencia di accion di e integran-tenan di Trias Politico!