Otmar Oduber Minister di Turismo a introduci su mes cerca promotornan y operadornan turistico di Europa
ORANJESTAD(AAN)— ATA Europa a prepara un anochi pa asina minister di turismo Otmar Oduber por a clausura su bishita intensivo cu reunionnan na Hulanda. For di momento cu minister Otmar Oduber a yega Hulanda diadomingo el a sali pa Bruselas caminda cu el a reuni cu e promotornan pa e mercado Europeo. Despues di eynan el a bolbe Den Haag caminda un serie di reunion a sigui. Minister Otmar Oduber tabata acompaña pa Mirna Jansen directora di oficina di turismo di Aruba y tambe Gina Lopez kende ta encarga cu e parti di mercadeo pa ATA.
Diabierna anochi nan a clausura e bishita di trabao cu un encuentro. Aki diferente operadornan tabata tey y Mirna Jansen a introduci e mandatario nobo di turismo.
Minister Otmar Oduber tambe a dirigi algun palabra y importante ta e gradecimento na esnan cu ta trahando fuerte pa e mercado Europeo keda uno halto of bira mihor pa Aruba.
No mester lubida cu minister Otmar Oduber a reuni tambe cu presidente di KLM pa asina busca e posibilidadnan pa trece KLM bek Aruba.
Riba e fotonan aki por haya un bista di e actividad di clausura di e prome bishita di Otmar Oduber como minister di turismo.
