Pa di tanto biaha a bay paga candela na dam di Sero Patrishi
ORANJESTAD.(AAN): — Den pasado no tabata dificil pa coba tereno pa saca santo y piedra. E tempo ey tabata tin 20 pa 30 mil habitante y no tabata causa molester, pero poblacion a aumenta te cu a wordo construi mas edificio y cas. Na mesun momento mas doño di tereno grandi tambe a cuminsa permiti pa santo y piedra wordo saca pa asina nan tin un entrada. Consecuencia ta cu masha hopi tereno cu a wordo coba awe ta forma peliger. Desconoci nan ta benta sushi den nan y hasta cende esakinan na candela. Na masha hopi ocacion bombero mester presenta pa alivia e situacion .
Bomberonan ta basha awa te cu tanki di e truck ta bira bashi sin cu logra paga e candela. Manera ta conoci huma ta causa masha molester cerca habitantenan y vecindario. Marduga di diahuebs central di bombero a dirigi un unidad di brandweer na Sero Patrishi, patruya di polis encarga cu distrito di Oranjestad tambe a bay na e dam cu a para bira un dump.
Personal di bombero a bisa polis cu no ta prome biaha cu nan mester a presenta pa combati e candela di sushi den e dam en cuestion.
Esaki ta di tantisimo biaha cu nan a bay na e mesun dam aki cu a wordo cendi na candela. Segun e personal di bombero e situacion e momento ey ta forma peliger pa e casnan habita den cercania di e dam.
Tambe lo pone polis di bario na altura di e situacion cu sigur mester di atencion pa evita esaki escala.
Lo investiga tambe kende nan lo ta benta sushi den e dam y peor ainda ta cu nan ta cende esaki na candela sin pensa riba e consecuencia cu por presenta.
