Partidor di DIARIO a worde atraca pa mucha di confianza!
Segun relato di victima, intencion tabata pa mate!
ORANJESTAD (AAN) – Hopi tristo cu awendia e bista di hendenan cu mal intencion ta poni riba nos grandinan, y tin di e delincuentenan aki cu ta mucha hoben. Den e caso aki ta trata di un mucha muher di 19 aña, anto pa colmo “hende di confianza” den e cas. DIARIO a entrevista e victima cu ta un di nos partidornan, señora Anna, un dama balente di 85 aña di edad, cu a lucha contra e atracadornan y a scapa su curpa. El a duna nos e siguiente relato.
Anna a conta nos cu dos pa tres siman pasa ya caba el a bira victima di ladronicia y e ta sospecha cu ta trata di e mesun hendenan cu a purba mate antayera. E prome biaha aki nan a bay cu su joyanan, celular, y otro pertenencianan.
Diamars, un mucha muher di fam Quandt, cu e conoce for di chikito, a bishita e dama. Incluso ta trata di un hobencita cu tin un yiu cu e nieto di e señora aki. Tempo cu e mucha tabata creciendo Anna a yude tambe, entre otro cu paña.
Anna a nota cu e mucha ta cana pia abao (kiermen sin zapato). Mientras cu Anna tabata cushina, e mucha tabata para na porta conversa cune y na dado momento el a pidie un tiki awa.
E señora no a desconfia ni un momento pasobra e ta un mucha muher di e vecindario cu na manera di bisa “a lanta den su cas”. El a bisa e mucha pa e mes pasa coi awa di e frishider. E mucha muher a drenta bebe awa, laba e glas, y Anna a puntre unda su yiunan ta.
El a contesta cu nan ta den creche y cu e ta busca nan banda di 12’ or y cu e ta warda su mama pariba pa bin buske (banda di e cas di Anna mes).
Pero esey no tabata berdad. Esun cu tabata warde ta su guy, ken señora Anna a conta nos a caba di sali foi prison. E mucha muher a bay, pero señora Anna ta mire ta pasa dilanti su cas dos biaha, anto cu pia abao, locual a hala su atencion, pero no a pone pensa mas leu, y el dicidi di bay sosega su curpa.
El a gewoon hala e porta di cas, y bay sinta den su stoel manera tur dia. E tin un stoel di esnan cu ta hala patras unda e ta relax. El a coi su corant pone riba mesa, pero el a bay den soño cu e no a ripara mes cu e mucha muher a habri e porta y drenta.
Anna ta kere cu ora e mucha muher a mire na soño el a pasa man pa dos serbet cu despues el a uza pa pone riba su nanishi pa purba hogue. Anna tin dos raspa na su frenta y te ainda su nanishi y cara ta cora y irita. Ademas cu e ta den shock emocional ainda.
Na cuminzamento Anna a kere cu ta un hende a haci chansa cune y a tapa su dos wowonan. Pero el a worde gara di patras cu e serbet y otro persona a tape cu e otro serbet cu e no por a hala rosea. El a cuminza perde rosea, y na dado momento el a reconoce e stem di e mucha muher cu a bisa e otro persona “e ta mata”!
Na e momento ey el a sinti cu Dios a dune forza pa e keda bringa defende su curpa, keda lucha cu nan, te cu nan a core bay. Anna a sali bay cerca su nuera y a conte cu un hende a bin choke y kier a mate pa horta den cas, y el a hera di corta full su rosea, pero el a logra di scapa su bida.
Señora Anna ta haya cu e mucha muher tin hopi curashi pa a bin haci algo asina, y e ta pensa cu como e ta partidor di DIARIO, e por a kere cu e tin placa den e cas.
Pesey e ta sospecha cu ta nan mes a drenta den su cas dos pa tres siman pasa horta tur su joyanan, pasobra e moda con nan a haci ta mustra esey. Señora Anna a duna tur e datonan na Recherche. Tambe su yiu muher a papia cu e mama di e mucha muher, cu ta un persona cu Anna ta aprecia hopi, pero el a bise cu e tin dianan sin wak su yiu muher y cu el a gaña pasobra e no a bay topa cu su yiu ningun momento.
Polis a gara e dos muchanan muher, pero e guy cu tabata vigila ki ora nan tabata sali for di e cas, ta e yiunan homber di Anna a gare. E no conoce e otro mucha muher pero e ta na haltura cu polis a laga nan liber caba y cu e hoben cu e conoce a admiti dilanti autoridad cu e kier a mata e señora.
Esaki ta e relato cu señora Anna a duna DIARIO y ta un lastima kico a sosode, cu ta un mucha muher asina yega na e cas di e famia aki, y cu hasta a worde yuda pa nan, ta bin haci algo asina horible. Danki Dios señora Anna ta un hende balente y cu bon salud, y cu nan no a logra kita su bida, y un caso manera esun di Savaneta (cu polis no a bolbe duna noticia riba esey) no a ripiti.
Ta di spera cu autoridad policial aplica e castigo cu e dos muchanan muher aki y e guy merece. No por ta asina cu hobennan cu, lamentablemente, ta bayendo den mal caminda ta terorizando hendenan grandi y cu awor hopi tin miedo si sali riba caya nan so, y te hasta di keda so den nan mes cas, pasobra delincuencia sin limite ta tumando lugar riba nos pais!
Maritza
Please mi ta pidi e gobierno nobo aki pa cambia e ley, hasi tur cos cu ta posibel pa cambia e ley Arthur hasi tur loke bo tin den bo man pa nan por hisa castigo pa e hende nan aki, tin biaha nos no mester tin piedad di nan pasobra nan si no tin piedad di niun hende, anto cambia ley tambe cu bo haya ladron den bo cas duna nan un bon sota abo no ta sali perhudica asina nos ta duna polis un ayudo tambe. Man duro cu e tipo di hende baho nan aki.
hik hik hik
Ladronnan no tin gevoel mas. Y ja nan ta den libertad? Nan a hera mata e senjora y e caso aki no por worde trata pa ladronicia sino intento di asesinato. Esta bunita ehempel nan ta pa e yui chikito. Kita e voogdij di e mama pa bienestar di e mucha. Pa colmo si e sra.a dalnan bek e lo a bai sera pa motibo di maltrato.
jose blanco
e malechornan aqui ta tranquil, pasobra nan no haja castigo di nada ya cu e ley aquinan no ta sirbi mas cu pa proteja e delincuencia. si nan no cambia e ley y pone mano duru cu e malechornan den un par di dianan ya nan no por controle mescos cu ta sosede na vzla. y tu e cameranan. y tralinan den cas, y scholl, no ta para e delincuencianan, ya cu nan tin armanan mas duro tambe. y si nan ta sali den cameranan di video. nan sali manjan, y hasi danjo na esun cu saca portret. por esey e pueblo mes ya cuminzando cumpra su armanan tambe. y ta vende su cachonan, pa cumpra GUNS pa defende su mes.