Prome fase di eliminacion di BBO a keda firma ayera den Conseho di Minister
Landsverordening cu ta reduci BBO na 1.5%
ORANJESTAD (AAN) – Conseho di Minister a convoca un conferencia di prensa, extraordinario, ayera mainta, den cual a hiba palabra Prome Minister mr. Mike Eman y Minister di Finanzanan y Utilidadnan ing. Mike de Meza. Tambe tabata presente Minister di Salud Publico dr. Richard Visser, Minister di Husticia, ken a contesta algun preguna na final di e conferencia. E punto principal di agenda tabata e firmamento di un documento for di e cuatro ministernan presente, cu cual ta seya e compromiso haci cu pueblo durante campaña, cu lo elimina BBO, cuminzando entrante 1 di Januari cu e prome fase di 1.5%.
E documento aki tin cu sigui su trayectoria di bay Raad van Advies prome, pa despues bay Parlamento pa worde trata y aproba. E decision aki mester ta cla prome cu entrante 31 di December 2009, pa asina e por drenta na vigor for di 1 Januari proximo.
“ Awe nos ta para na un momento grandi asina y nos ta invita boso pa comparti cu nos e momento cu nos ta bay firma e ‘landsverordening tot veewijzing, van de landsverordening Belasting of Bedrijfsomzet’.
E ley aki ta bisa cu e porcentahe riba BBO ta 3% y awor nos ta bay firma e ley cu ta bisa cu e ta bira 1.5%”, Minister Presidente mr. Mike Eman a splica.
El a agrega cu den su dos fase lo elimina e otro 1.5% cu ta un peso hopi grandi riba nos conciudadanonan. Riba potret por aprecia momento cu e firmamento aki a tuma lugar, den presencia di prensa.
