Reduccion y eliminacion di BBO lo beneficia e empresanan tambe
Minister Presidente convenci:
ORANJESTAD (AAN) — Prome Minister, mr. Mike Eman, ta convenci cu e reduccion di BBO ya caba lo trece un diferencia den e poder di compra di nos poblacion, no solamente riba gastonan familiar den cada hogar, incluyendo e cuenta di awa y coriente, pero tambe di e gastonan cu empresarionan tin cu haci. Premier Eman a splica: “ Pasobra e empresanan tambe, pa tur servicio cu nan mester cumpra, nan ta pagando BBO y e reduccion y liminacion di e impuesto aki tambe bay baha e gastonan di operacion di empresanan.
Tambe nos ta mira un efecto positivo como estimulo economico. Hopi pais na mundo, enfrentando e crisis cu tin pa loke ta trata nan economia, ta tumando pasonan pa reduci nan impuestonan. Na Inglatera, por ehemplo, nan a baha e BTW cu 2.5% y el a yuda hopi. Aña pasa nan a mire den e consumo publico pa loke ta e periodo di Pasco, y hopi corant a skirbi riba esey.
Den otro paisnan manera Merca, esfuerzonan grandi ta worde haci pa duna e economia un estimulo pa medio di inversion di parti di e gobierno y nos pais tambe mester aplica un politica asina.
“ Mirando e situacion economico cu tabata tin ya prome cu e crisis mundial, cu tabata indicando un debilitacion di e posicion economico di Aruba, y den e posicion di competencia, y hunto awor, naturalmente, cu e crisis economico e tipo di iniciativanan asina pa fortalece e poder di compra y reduci e peso riba e operacion comercial di empresanan na Aruba, nos ta kere lo ta un estimulo importante, naturalmente banda di e efecto psicologico cu Aruba aworaki ta cuminza conta e momentonan di alivio y cambio di direccion cu nos ta kere ta bay fortalece e optimismo cu mester den un mercado, di nos comunidad.
“ Nos mester mira perspectivanan cu ta brinda e futuro pa nos pais y pa nan mes pa asina nan tambe por haci nan inversionnan y por sali for di e estado pesimista cu nos a bin ta encontra. Y mirando tambe investigacionnan cu a worde haci di Banco Central, cu ta indica cu e consumo tabata hopi abao na Aruba e ultimo lunanan, y nos ta kere cu esaki tambe ta un impulso pa restablece e confianza di e consumidor den e futuro di nos pais”, mr. Eman a remarca.
Gobierno a duna ayera otro paso den e cambio di direccion di nos pais, y nan ta spera cu pronto lo trata e ley di reduccion di BBO den Parlamento, hunto cu e aumento di bijstand hunto cu un pakete completo di asistencia social, pa esnan di menos recurso y pa tur esnan cu ta cargando e peso di BBO y otronan cu a worde implementa e ultimo añanan.
