Home Deporte Resultado Campeonato Hubenil, Pasarela, Cadet y Junior

Resultado Campeonato Hubenil, Pasarela, Cadet y Junior

2
0
SHARE
- Advertisement -

basket1ORANJESTAD (AAN)— Siguientemente nos ta presenta e resultadonan pa e weganan di basketball di e divisionnan Pasarela, Cadet y Junior cu a tuma lugar mas recientemente.
Pasarela 13-14 aña: Pa 6’or y mei di atardi den division pasarela Estrella Aruba Lions a hunga contra YMCA San Nicolas, un wega basta rapido y cu hungadornan di bon estatura pa cu e division aki. Na halftime e wega tabata 30 pa Estrella Aruba Lions y 26 pa YMCA San Nicolas. Tabata Michael Haverton cu a percura pa cu Estrella Aruba Lions tabata gana na mitar di wega. Den e promer quarter Gio Geerman a sali for di wega cu un lesion na su man y no a hunga mas. Gio Geerman ta un atleta hopi agil pa su penetracionan pa e basket y tabata ariba banki sin por yuda su team mas. E wega a termina 53 pa YMCA San Nicolas y 41 pa Estrella Aruba Lions.

Esnan cu a sobresali pa YMCA San Nicolas tabata Eric Richardson cu 10 punto, Kenny Scott cu 12 punto y Kahlil Serrant cu 19 puntos. Kahlil Serrant a score tur e 19 puntonan den e second-half y e wega a wordo dirigi door di Incoe Martinus. Scorer pa e wega tabata Patrick Arens y Janice Geerman tabata e timer.

Cadet 15-16 aña:
Pa 8’or di anochi a sigui e di dos wega cu tabata entre Estrella Aruba Lions contra Aruba Juniors Radio Shack Red Devil. Esnan cu a presencia e wega aki sigur a disfruta di un bon wega di basket hubenil. Hopi hungadornan cu a yega di forma parti di seleccion di mini na 2005 awor ta hungadornan di e division aki.

Den Estrella Aruba Lions tin hungadornan manera Jarinho Geerman, Jordan Guardiola y Francis Pacheco cu ta hungadornan cu a cuminsa cu mini na 2005. Den Aruba Juniors Radio Shack Red Devil tin hungadornan cu tambe tabata forma parti di e seleccion di mini, esta e rumanan Gavin y Garret Tromp y Justin Every.

Den e prome quarter Aruba Juniors Radio Shack Red Devil tabata gana 18-13. E rumanan Tromp constantemente tabata penetra y tabata hinca e basketnan cu facilidad, tur dos tabata tira balanan for di 3 point line y tabata score.

Chesron Elgin ta un hungadorna hopi liher y agresivo, e tambe tabata penetra cu bala y tabata hinca basketnan cu basta facilidad. Christopher Boezem a hunga un bon defense, e a percura pa a block diferente basket di Francis Pacheco.

Na half e wega tabata 32-29 pa Estrella Aruba Lions. E tercer quarter tambe Estrella Aruba Lions a keda mantene su bentaha di 2 punto.

Den e di 4 quarter tambe e wega a keda pareu; practicamente faltando 2 minuut cu Estrella Aruba Lions, door di Kevin Iguaran, Luis Araque y Jordy Orosco a steal diferente bala tras di otro pa aumenta e ventaha cu 6 punto.

Estrella Aruba Lions por a keda cu e bentaha aki si a sigui instruccionan di e coach cu tabata pidi pa calma e wega. Faltando apenas 3 seconde Gavin Tromp a tira un basket for di 3 point line y a score esaki. E wega a termina 53 – 50 na fabor di Estrella Aruba Lions. Jarinho Geerman y Jordan Guardiola a score 15 punto y Francis Pacheco a score 9 punto.

Pa Aruba Juniors Radio Shack Red Devil e top scorernan tabata Gavin Tromp cu 11 punto, Garret Tromp cu 13 punto y Chesron Elgin cu 14 punto.

Diabierna 6 di november 2009 ta sigui cu e campeonato hubenil 2009 cuminsando pa 7’or di anochi na Aruba Juniors. Ariba programa tin dos wega di Cadet, e promer wega ta entre Estrella Aruba Lions vs. RCA Kliphunters.

- Advertisement -

DUNA COMENTARIO

Please enter your comment!
Please enter your name here