Home General Ricibimento masivo y caluroso dilanti Bestuurskantoor

Ricibimento masivo y caluroso dilanti Bestuurskantoor

0
0
SHARE
- Advertisement -

gobierno1Na Gabinete Mike Eman I:
ORANJESTAD (AAN) – Un cantidad grandi di ciudadanonan a bin hunto, diabierna anochi, pa ricibi cu aplauso y expresionnan di cariño e Gabinete Mike Eman-1, dilanti Bestuurskantoor.
Emocionnan tabata grandi y manera cada mandatario tabata yega, e multitud tabata aplaudi cariñosamente, hendenan a move di nan lugar bay te meymey di caminda pa braza nan, bisa nan palabranan di forza y desea nan hopi exito den e tarea dificil cu nan tin nan dilanti.

Ora e Parlamentarionan di AVP (esnan di MEP no tabata tey) y tambe mr. Andin Bikker a yega tambe por a mira con aplausonan tabata rezona. E speranza cu ta biba den pueblo ta bisto, y esey a keda demostra door di e interes di tantisimo hende cu a haci acto di presencia y algo sumamente importante pa bisa ta, cu no tur a bin cu auto, hopi a bin den bus.

Banda di 9.OO’or di anochi, e terminal di Arubus tabata basta yen di pasahero, wardando nan bus pa bay San Nicolas of Santa Cruz, y nan tabata personanan cu a bay celebra di e ocasion aki.
Hopi bunita tabata e iniciativo di laga pastornan di diferente Misa hiba palabra. Maske cu cada un ta di un denominacion diferente, tur a trece dilanti cu sin Dios nos no tin nada, y cu sin Dios nada por logra, y hopi bendicion e ministernan a haya, hopi peticion y te hasta un oracion unda e presentenan a tuma man di otro a worde haci.

E entusiasmo di e Prome Minister di Antiyas tabata obvio. E no por a disimula ni un tiki su emocion y alegria cu e cambio di Gobierno y kico e ta spera di dje como prome mandatario di un Isla ruman, cu ta desea pa e relacionnan entre Aruba y e Islanan tanto awor como despues di e desintegracion di Antiyas, keda mehora.

Un ceremonia enberdad cu yen di emocion a tuma lugar. Por a nota tambe hopi emocion den e palabranan di Prome Minister mr. Mike Eman, cu e humildad cu el a expresa su mes, cu optimismo y cu FE den su team y e lucha cu nan a cuminza caba, pasobra el a anuncia pa diasabra cu a pasa merdia, nan prome Ministerraad.

E momento cu a pasa e video riba pantaya grandi di con Bestuurskantoor tabata un luna pasa, y awor un luna despues, a impresiona e publico presente. Tur hende a lanta para pa aplaudi e boluntarionan y locual nan a logra.

E parti cultural a trece un toke diferente, y algo cu e publico a goza hopi ta e momento cu muchanan bisti na diferente paña tipico di nan pais di origen a desfila y a presenta riba stage. Dos coro a pone e nota musical cuminzando cu Himno di Aruba y na final cu e wals di Padu Lampe “Abo so”.

Ya e trabao di e gobierno nobo a cuminza. Celebracion ta tras di lomba, y un biaha mas nos ta desea Gabinete Mike Eman 1 y Parlamento hopi forza, e mehor boluntad pa traha duro pa nos pais, y cu e logranan cuminza bira visible den corto tempo, pasobra nos pueblo ta expect hopi mes di nan tur.

- Advertisement -

DUNA COMENTARIO

Please enter your comment!
Please enter your name here