Rupert Ammerlaan y Alexander Robert a destaca den 3rd RBTT Bank Triathlon Off road
ORANJESTAD (AAN)— Diadomingo ultimo a tuma lugar e di 3 “R.B.T.T. Bank Off-Road Triathlon”, organisa pa Aruba Triathlon Assosiation y Tri-Bike Aruba. Den e competencia aki tabata tin 93 participante, y mester duna merito na e atleta Rubert Ammerlaan di 70 aña kende ainda ta un tri-atleta activo y a completa e trayecto di Full distance. E evento deportivo aki a bolbe tuma lugar na Arashi Beach (West Punt/Cudarebe). Por a scoge entre distancia cortico pa muchanan/hobennan y esnan cu menos experencia den e deporte aki.
E otro tri-atletanan a haci e distancia dobbel, tambe por a participa den categoria di “Relay” distancia cortico y distancia dobbel.
E trayecto di e off-road triathlon a consisti di landamento cual a tuma lugar den laman di Arashi, sigui pa e parti di “Mountain Bike” cu a pasa ariba caminda di tera, den e dunanan y banda California Lighthouse. E competencia a culmina cu e parti di coremento na pia cu a tuma lugar riba caminda di tera y a finalisa riba beach.
A.T.A kier a duna un pabien na: Alexander Robert, Ganador di e “Full distance” cu un tempo di 1.04.19; Alexander Robert ta ganador tambe di OFF Road Triathlon 2008.
Mester menciona cu e careda no lo tawata posibel sin e ayudo di e boluntarionan cu a haci un tremendo trabou, Aruba Triathlon Association kier a manda un palabra di agradecimiento pa nan.
Un danki grandi ta bay na R.B.T.T. Bank como Sponsor principal y tabata tin empleado di R.B.T.T. Bank cu tambe a participa den e triathlon aki, a la vez kier a probecha e oportunidad pa gradici tur e sponsornan cu a hasi e competencia aki posibel.
ATA tin pa e aña aki ainda e Duathlon Nacional cu lo tuma lugar dia 28 di november pa 4:30 di atardi na Bucuti.
