Schedule di weganan di Copa San Nicolas pa Diadomingo awor
ORANJESTAD (AAN)— Pa tur esnan cu ta sigui e desaroyo di e Copa San Nicolas, nos ta informa un y tur ariba e schedule di e weganan cu lo mester tuma lugar Diadomingo awor na veld di Madushi Stars. Pa 10’or di mainta lo tin e prome encuentro entre Coca Cola Warriors kendenan ta den e posicion #2 di e Pool A, nan lo bai enfrenta e team di Quisqueya cu ta #3 den e Pool B, e ganador di e encuentro aki lo bira Ganador A. Pa 11:45 di mainta lo tin e di dos encuentro entre Bad Devils cu ta na cabes di e Pool B, e diabelnan aki lo enfrenta e team di cas, esta Madushi Stars kendenan ta #4 den Pool A. E ganador di e encuentro aki lo bira Ganador B.
Pa 1:30 di atardi lo tin e encuentro entre De Cuba Electrical cu ta #2 di Pool B, lo bai enfrenta Unity cu ta #3 di Pool A. E ganador di e encuentro aki lo bira Ganador C.
Finalmente pa 3:15 di atardi, Eagles cu ta #1 di Pool A, lo midi forza contra di Staka Boys cu ta #4 di Pool B. E ganador lo bira Ganador D.
Un biaha mas nos ta invita cordialmente na e fanaticada di Copa Softball San Nicolas y asisti diadomingo awor na veld di Madushi Stars caminda e teamnan aki lo bai bataya duro pa gana e titulo di campeon di Copa San Nicolas 2009.
