Home Deporte Sint Augustinus College a bira CAMPEON

Sint Augustinus College a bira CAMPEON

4
0
SHARE
- Advertisement -

volley1Di Volleyball Escolar pa Schoolnan di Enseñansa Avansa
ORANJESTAD(AAN)—Instituto pa Deporte Educacion Fisico y Recreacion, IDEFRE ta sigui cu competencia den Deporte Escolar. Despues di e competencia di volleyball escolar pa Schoolnan Basico, IDEFRE a continua cu e competencia di volleyball pa Schoolnan di Enseñansa Avansa. A reparti e schoolnan den 5 poule pa asina hunga contra otro.

Poule A y Poule B Den poule A tabata EPB San Nicolaas, Filomena College y Sint Augustinus College, mientras cu den poule B a haya Abraham de Veer School, John Wesley College y Colegio Arubano San Nicolaas cu ta schoolnan di sector San Nicolaas.

Competencia entre e schoolnan aki a tuma lugar na Centro Deportivo Betico Croes na Santa Cruz pa mira cual school ta clasifica pa continua den siguiente buelta.

Den poule A, a clasifica na prome lugar Sint Augustinus College y na di dos lugar Filomena College. Mientras cu den poule B, a clasifica na prome lugar John Wesley College y na di dos lugar Colegio Arubano San Nicolaas.
Sector Oranjestad

Demas school di Oranjestad y vecindario a keda reparti den 3 poule. Den poule C a haya Juliana School y La Salle College. Den poule D, Maria College, Mon Plaisir College y Colegio Arubano Oranjestad. Y den poule E, EPB Hato, International School y Colegio San Antonio.

Mescos cu sector San Nicolaas, e schoolnan a hunga contra otro pa dicidi nan clasificacion. Aki ta unda den poule C, a clasifica La Salle College na prome lugar y Juliana School na di dos lugar. Den poule D tabata Maria College na prome lugar y Colegio Arubano Oranjestad na di dos lugar.

Y den poule C, Colegio San Antonio a keda na prome lugar y EPB Hato na di dos lugar. Tur wega di sector Oranjestad tambe a tuma lugar na Centro Deportivo Betico Croes na Santa Cruz.
Weganan di ‘Halve Finale’

E schoolnan cu a clasifica na prome y di dos lugar den nan poule a sigui pa e weganan di ‘Halve Finale’ cu a tuma lugar riba cancha di volleyball di Compleho Deportivo Frans Figaroa na Noord.
Pa ‘Halve Finale’ a forma 2 poule di cual den poule F a haya Sint Augustinus College, Juliana School, Maria College, Colegio Arubano San Nicolaas y Colegio San Antonio.

Den e poule aki tabata Sint Augustinus College cu ta finalisa na prome lugar cu 16 punto despues di gana tur wega, mientras cu Colegio San Antonio ta finalisa na di dos lugar cu 12 punto. Esaki ta duna ambos school e pase pa final nacional.

Poule G a keda forma pa Filomena College, La Salle College, John Wesley College, Colegio Arubano Oranjestad y EPB Hato. Colegio Arubano Oranjestad, cu ta e campeon di aña pasa, a finalisa na prome lugar den e poule aki cu 14 punto, mientras cu La Salle College a keda na di dos lugar cu 12 punto. Hunto nan ta sigui pa e final nacional.

Final Nacional di Volleyball Escolar pa Enseñansa Avansa
E weganan pa final nacional a tuma lugar riba canchanan di Compleho Deportivo Frans Figaroa na Noord. Riba cancha 1 ta enfrenta otro Sint Augustinus College y La Salle College. E wega aki ta bay den dos set sigui cu score di 25 – 22 y 25 – 7 na fabor di Sint Augustinus College, cu automaticamente ta pasa pa e wega pa campeon.

Riba cancha 2 ta enfrenta otro Colegio Arubano Oranjestad y Colegio San Antonio. E wega entre ambos school a bay den dos set cu score di 25 – 21 y 25 – 7 na fabor di Colegio Arubano Oranjestad, cu ta pasa pa hunga e wega pa campeon contra di Sint Augustinus College.
Wega pa 3er y 4er Lugar

E wega pa di tres y di cuater lugar a bay entre La Salle College y Colegio San Antonio. E prome set a resulta den un wega hopi interesante, den cual ambos school a duna fuerte bataya. E set a finalisa 25 – 21 na fabor di Colegio San Antonio. Cu e prome set gana, Colegio San Antonio a haya forza y crece pa demostra superioridad den e di dos set y ta logra gana esaki tambe cu e score di 25 pa 16.

E resultado di e wega ta duna cu La Salle College ta keda na di 4er lugar y Colegio San Antonio na di 3er lugar den e competencia di volleyball escolar pa Enseñansa Avansa.
Wega pa Campeon

E schoolnan cu a enfrenta otro pa e titulo di campeon tabata Sint Augustinus College y Colegio Arubano Oranjestad. Sint Augustinus College ta bin di gana tur wega anterior pa enfrenta e campeon di aña pasa y ta brinda na publico presente un tremendo wega.

Sint Augustinus College ta gana e wega den ambos set cu score di 25 – 9 y 25 – 15, y ta bira asina Campeon di Volleyball Escolar pa Enseñansa Avansa 2009 – 2010, mientras cu Colegio Arubano Oranjestad ta keda na di dos lugar. Cu e logro aki, Sint Augustinus College ta bira e school cu ta representa Aruba na e Weganan Interinsular cu ta tuma lugar na isla di Boneiro for di dia 26 pa dia 28 di maart 2010.

IDEFRE ta felicita tur school cu a participa na e competencia e aña aki, como tambe na dirigentenan deportivo di cada school cu a duna nan aporte pa e school por participa. Un pabien grandi na Sint Augustinus College y e mihor deseo di exito pa su participacion den e competencia di Weganan Interinsular proximo aña. Un palabra di gradicimento na tur referee cu a duna nan colaboracion pa e weganan tabata exitoso.

- Advertisement -

DUNA COMENTARIO

Please enter your comment!
Please enter your name here