Home Deporte SV Bubali ta haya un bida despues di a derota SV Britannia...

SV Bubali ta haya un bida despues di a derota SV Britannia 2 – 1

0
0
SHARE
- Advertisement -

futbol1ORANJESTAD (AAN) — Diadomingo atardi nos a presencia e partido entre Britannia y Bubali den Centro Deportivo Frans Figaroa na Noord. Un partido hopi anticipa, mirando cu riba papel ambos equipo ta dispone di un elenco tremendo, un Bubali cu den su alineacion tabatin un hungador di Boneiro como nan refuerso nobo. Un victoria pa e equipo di Britannia lo nifica cu nan lo comanda e tabla di posicion mirando e empate di diabierna di e savaneteronan di La Fama, di otro banda Bubali cu un victoria lo haya un bida ya cu nan lo bai na di cuarto lugar cu 9 punto, saliendo for di sotano.
Prome tempo Den e prome tempo nos por a mira un bon futbol hunga pa ambos equipo, tur dos tabata trata na toka e bala, buscando nan atakenan, dor di crea un wega forma pa toke di bala. Un Britannia cu den apenas 10 minut di wega ta haya dos tiro liber cerca di e rand di area penal di Bubali, pero den ambos ocasion e delantero Jonathan Lake, no ta logra anota, e prome ta pasa over di gol y e di dos, portero Dania, porcierto ex Britannia, ta pomp manda afor.

Segun e wega ta sigui su curso Britannia ta bira mas peligroso, pero sin forma mucho peliger dilanti di e porteria defendi pa Dania di Bubali. Remarcabel ta cu e delanteria di Bubali tabata core hopi den posicion adelanta, cada vez e hungadornan tabata core dilanti di e bala.

Ta bon pa bisa si cu referee Mackay tabata man yen cu e hugadanan duro cu ta ser hunga ariba otro, na varios ocasion e mester a adverti of saca carchi pa calma e hungadornan. Mucho mas no a pasa den e prome tempo.

Segundo tempo
Den e segundo tempo nos por a mira un Britannia cu rapidamente a cuminsa na busca e atake pa asina habri e marcador tempran den e di dos tempo.

Na di 52min, Britannia ta bai ariba 1 – 0 ora cu Jonathan Lake ta manda un canonazo duro y ta bati portero Dania, despues di a domina e bala den e area penal y sin mucho problema tira esaki riba gol, den e hugada aki e hungadornan di Bubali a keda para, tur e kere cu Jonathan ta offside.
Un par di munit despues tabata e bolante robez, Nino Nunez, kende ta dal e bala contra portero Dania, na luga di lob esaki over di su cabez.

Ta bon pa menciona cu e wega den medio campo a keda manera habri, hopi bala largo ta ser hunga for di defensa padilanti, saltando e medio campo por completo. Riba dje e cansancio tambe a hunga un rol importante, ya cu hopi tereno a ser cubri pa ambos equipo, dor di lansa contratakenan peligroso riba otro.

Na di 61.min, e delantero Maurice Escalona di Bubali ta empata e partido, tras di un fayo di e defensa di Britannia, un free-kick liher cobra na unda henter e linea di defensa di Britannia ta keda drumi y ta mira Maurice manda un tiro lastra den skina robez pa asina bati portero David Lacle.

Despues di e gol aki SV Britannia ta opta pa bai den e ofensiva cu hopi hende tras di e bala, den menos cu dos minut, SV Britannia ta hera e chens di bai ariba den e marcador, na unda prome, Marlon Andrea kende ta substitui Cano, ta tira bon, pero Dania ta luci y ta manda e bala corner, den e di otro oportunidad Ulisez Nunez ta faya cu cabez su so dilanti gol.

Di otro banda mester bisa cu Bubali tampoco no ta keda atras, na unda Maurice Escalona ta anota un gol, pero e bandera ta bai halto pa posicion adelanta. Na di 80min di wega, den un hugada hopi duduso, Bubali ta haya un penalty despues cu Gio ta dal den Sonny y esaki ta cai, referee Mackay ta pita penalty, e hungadornna di Britannia ta keda babuca cu e penalty duna.

Esaki ta ser bon cobra pa Maurice Escalona, kende ta anota su di dos tanto, cu un tiro den skina robez.

Faltando algun minut pa e wega termina referee Mackay ta saca Jonathan Lake cu carchi cora for di wega, segun ta mustra cu Jonathan lo a bisa algo for di sla. Den e minutnan restante e equipo di Britannia a purba di tabla e partido, pero envano.

Analisando e partido mester bisa cu Britannia a domina gran parti di e wega, pero ta lubida di anota gol, di otro banda Bubali a probecha di e momentonan oportuno y ta piki su tres puntonan. Cu e victoria aki, Bubali ta haya un bida y ta bai na 9 punto, mientras Britannia ta keda na di dos lugar cu 15 punto.

Mester bisa cu portero Dania di Bubali ta keda lesiona despues di wega y ta keda benta abou pa basta rato, a pidi asistencia y cu brancard di Ambulance a bahe for di tereno. Nos ta desea portero Dania un pronto recuperacion.

- Advertisement -

DUNA COMENTARIO

Please enter your comment!
Please enter your name here