Ta un berguenza pa wak con un Minister ta contradeci su mes
Segun Ronny Gomez di taxi bond,
ORANJESTAD(AAN): Esnan cu ta core taxi ainda no por caba di compronde dicon ex Minister Edison Briesen den un reunion a bisa cu lo no bin mas permiso pa taxi y toch a dicidi di duna 52 ‘oezegging’. Relaciona cu esaki DIARIO a entrevista Ronny Gomez di sindicato di taxista, kende a bisa cu hopi hende kier tapa solo cu un dede y nan ta kere cu nan ta bay keda biba pa semper riba e mundo aki.
El a sigui bisa cu hopi biaha e no ta reacciona riba cosnan cu ta wordo bisa, pero mirando cu e mes tabata presente den e reunion, el a dicidi di papia.
Segun Gomez, e kier refresca memoria di Edison Briesen, pasobra e no sa si Briesen tabata bebi e ora ey.
Nos ta bibando den un mundo cu hopi tecnologia y awendia bo por graba un hende riba bo celular.
Esaki segun Gomez, kende a bisa cu pa casualidad un di su coleganan a graba henter e combersacion di e Minister y e taxistanan.
Den e combersacion e Minister a bisa bon cla cu no ta bay tin mas taxi. Gobierno mes a menciona cu segun diferente rapport nan no por duna mas permiso.
Te hasta Briesen a bisa cu den porta di eleccion e no ta bay hasi un cos asina di duna mas permiso.
Pues pesey segun Gomez ta duel e cu awor e ex Minister ta bisa cu tabata cla y raspa cu el a bisa cu mas permiso lo bay wordo duna.
Gomez a splica cu hendenan ta fada di e tipo di weganan politico cu semper ta sigui wordo hunga cada biaha atrobe.
Mester stop di priminti hende cos, pasobra nan a campana pabo, segun Gomez.
El a sigui bisa cu Briesen tabata tin 8 aña di tempo pa bin cu mehoracionnan y den e 8 añanan ey e por a duna e hendenan e permisonan di taxi si e tabata kier, pero el a dicidi te na final pa hasi esaki.
Gomez a bisa tambe cu ta un berguenza pa wak con un Minister ta contradeci su mes, riba varios aspecto.
