Diario Online

“Pa Mustra Na Placa Chikito Con Putri Nos Sistema Hudicial Ta!”

Publication: Thursday, 31 December 2009. Categoria: General,Judicial

Abogado Duijneveld skirbiendo buki:

ORANJESTAD (AAN) – Un declaracion bastante fuerte ta loke Abogado mr. Edwin Duijneveld a duna ayera, den conferencia di prensa, dirigiendo su mes na e sistema di Ministerio Publico.

“ Amigonan cu ta traha den Ministerio Publico mes, ta bisa mi: ‘Edwin, mehor bo keda keto pasobra esnan encarga cu bo caso, lo haci todo por todo pa ‘hodebo’. Algun colega Abogado a bisa mi pa mehor mi ta cauteloso pasobra tin algun elemento den e Cuerpo, cu ta capaz di cualkier cos. Akinan sinta, mi ta sigura un y tur, cu hamas lo mi cera pa inhusticia, cera mi boca pa manipulacion, y cera mi boca pa corupcion! Pa e motibo ey tambe, awe, mi ta anuncia cu mi ta bezig ta skirbi un buki, na unda lo mi mustra na placa chikito, con putri nos sistema hudicial ta, con manipulacion ta tuma lugar, con hende ta abusa di nan poder, nan posicion, den nos sistema hudicial”, mr. Duijnevel a expresa.

El a señala cu siman pasa cu e tabata na Hulanda, el a papia cu un di e editornan grandi aya, cu ta dispuesto pa publica su buki manera e tine cla, y e ta hopi leu caba.

“ E fondonan pa e buki lo bin for di oficina di un colega Abogado na Hulanda, cu ta hopi conoci na Aruba tambe, pero e ta prefera pa aworaki mi no mencione, pero boso lo haya sa pronto”, e abogado a agrega.