Abogado Duijneveld Ta Mantene Su Inocencia!
Tocante caso pendiente riba su persona:
Cu e seguridad cu lo sali liber di tur acusacion
ORANJESTAD (AAN) – Abogado mr. Edwin Duijneveld a yama un conferencia ayera mainta, pa alerta riba un especulacion eroneo cu tin riba caya, cu ayera el a haya un yamada di Ministerio Publico pa presenta na Corte, 11 di Maart di 2010.
“Boso tur sa cu algun siman despues di e welga di trahadornan publico, mi a worde deteni pa un par di dia, supuestamente riba sospecho cu mi a yuda un cliente di nos oficina, señor Luis Mansur, cu ta den bancarota desde 2002 y sconde placa pa e curator y asina perhudica esnan cu e ta debe.
“ Te ainda mi no por kita e sentimento cu tabata tin hopi mas atras di e detencion di mi persona. Pero esey, mi lo warda den un eventual huicio. Solamente mi por bisa, cu tin indicacion fuerte cu henter e asunto aki a worde manipula politicamente y tabata tin contacto constante entre husticia, algun politico, y hendenan hopi cerca di e gobierno anterior.
“ Un biaha mas mi ta bise: mi ta mantene mi inocencia y mi tin tur confianza cu mi lo sali liber for di e asunto aki. Cu Ministerio Publico ta bezig y a haci e asunto aki uno personal y ta mal uza su poder ta bisto, y ta bira mas cla ainda, ora ayera mi mes a scucha di e deurwaarder, cu el a haya opdracht explicito pa entrega e citacion na mi persona net prome cu Pasco, loke e no a logra pa motibo cu mi no tabata na Aruba”, mr. Duijneveld a subraya.
El a sigui bisa cu lamentablemente, e noticia pa un of otro motibo, a sali den Corant Amigo, y e ta kere cu, aparentemente, nan ta gusta “liek” pa asina haci daño na su persona y su famia.
“ Con e aparato, cerca di e hendenan aki ta pretende di para pa husticia? Aparentemente, berdadnan den mi declaracionnan di e ultimo tempo ta haci nan hopi dolor. Mi tin prueba con nos sistema no ta funciona, sinta banda di mi cu dos hende cu a keda cera, un pa basta tempo y mi ta sigur cu lo no bin castigo pa nan”, segun abogado mr. Duijneveld.
