ORANJESTAD (AAN): Pa prome biaha y como primicia pa henter pueblo di Aruba, despues di un trayectoria musical di 10 aña riba e isla, Marisela Musik lo presenta un concierto completamente nobo y original, cu tur e canticanan di inspiracionan propio.
Tur e temanan aki lo forma parti di su prome album titula “She Confidential”, cu lo bay worde lanza pa otro aña 2010.
Awe Diaranzon for di 9’or di anochi, Hard Rock Cafe ta orguyoso di presenta e artista aki cu Venezuela a wak nace y Aruba a wak crece. Durante e anochi aki lo tin e lanzamento di su prome single y video clip “She Confidential”.
Marisela hunto cu su banda di 7 aña “Aquarius”, y 5 invitado musical mas un invitado internacional, ta bay duna un concierto hamas visto. Esaki lo worde presenta riba un super stage cu e famoso compania di sonido y entretinimento “Elite”, ta bay pone specialmente pa Marisela.
Lo por bay mira luznan y efectonan pa haci di e concierto aki un espectaculo inolvidable. Tambe lo tin rifa di un guitara di Marisela cu e mes lo pone firma riba dje y duna riba stage pa un ganador feliz. Ainda mas lo tin hopi otro premio y sorpresa pa e publico presente.
Marisela cu su banda y henter su show tin e respaldo di sponsors cu a haci e espectaculo aki un realidad.
Despues di e actividad den Hard Rock Cafe, lo hasta sigui un Afterparty na South Beach Lounge! E anochi aki tin chens di cumpra e CD single y e DVD di e videoclip nobo tambe.
