Awe Ta Di 31 Biaha Roberto Geerman Ta Presenta ‘Conteo Di Fin Di Aña Riba Gfm 99.9
ORANJESTAD(AAN): Naci riba 23 di Augustus 1959, Roberto Geerman a cuminza su carera como locutor di radio na 1979. Su tata Wilhelm Geerman, mihor conoci como Bill, tabata un persona bon conoci na San Nicolas. El a contribui atravez di su amor pa San Nicolas riba varios area.
Roberto a cuminza su carera na Radio Antillana y den corto tempo el a sigui e pasonan di su tata, participando na tur tipo di actividad y organizacion. Na 1979 el a cuminza e programa “Conteo di fin di Aña, cu awor ta worde considera un tradicion den comunidad Arubiano.
Na final di 2009 el a yega 30 aña ta haci e programa aki. Bisando ayo na e aña bieu y dunando bon bini na aña nobo. Roberto tabata MC pa Miss Teenage seccion San Nicolas, festival di Calypso di mucha y di adulto, Sanifesta y otro actividadnan na San Nicolas.
Siendo un persona creativo, Roberto a cuminza traha ‘speech’ pa candidatonan di San Nicolas. Chastity Hodge y Tricia Werleman ta djis 2 di e beyezanan di San Nicolas cuna uza e speech-nan di Roberto y a bin back cu e titulo y first runner up. Sin hesita Roberto a sponsor tambe y ainda ta sponsor cualkier cos cu ta envolvi talentonan di San Nicolas. E ta worde yama tambe e encyclopedia di Calypso.
Musico, compositor y calypsonians semper ta bay cerca dje ora nan mester di material local di calypso.
For di 1971 caba e tabata bay Calypso y Roadmarch contest.
E mainta di e anochi final di Calypso, Roberto ta presenta su programa faborito na radio, cu ta “Na caminda pa calypso contest”.
Durante e programa e ta comparti cu e oyentenan e clasiconan di calypso.
Roberto tin calypsonan di for di e añanan trempan.
Na 1999 ASOMA y SAC a dedica Calypso y Roadmarch contest na honor di Roberto.
Organizadornan di JUBU happening tambe a reconoce su talento.
Roberto a bira prome locutor di radio di tin un programa na 3 stacion di radio na mes momento.
Esey tabata na 1983 na Radio Antillana, Radio Carina y Canal 90 fm.
Pa un periodo cortico, Roberto tabata presidente di Centro di Bario Lago Heights seccion di hubentud.
Na 1983 Roberto a participa tambe den area politico, como candidato di PDA.
Hunto cu su amigo Ruben Garcia, el a crea S.O.S, un actividad di beach durante temporada di Pasco Grandi.
Tambe el a crea “Carnathon”, un programa maratonico di musica di Carnaval cu tabata dura 50 ora y awor ta dura 100 ora.
Roberto Geerman te awor ta e unico persona te ainda cu a gana locutor, producer y programa di aña den mesun aña.
El a yega di gana varios premio pa su talento.
Roberto a worde reconoci tambe pa Instituto di Cultura y Comision Organizador Festival di Dande, pa su contribucion di aña.
El a crea tambe un estilo unico di trece deporta na radio, unda e ta crea emocion grandi pa esnan cu ta scucha.
Esnan cu ta scucha ta sinti cu nan mes ta riba veld.
El a cubri tur wega di Reino desde 1995 y mayoria for di su propio saco.
E aña aki Minister di Deporte di e tempo ey Ramon Lee a condecora pa su logro.
Compositor Robert Maduro a dedica dos cancion na honor di Roberto, pa su di 25 y su di 30 aña haciendo e programa Conteo di fin di aña.
Desde 1999 Roberto a cuminza duna su salud mas atencion, mirando cu el a yega te na 400 liber di peso.
For di aña pasa te cu awor sinembargo, e cuido y amor cu el a duna su mes a pone cu el a bira un persona mas saludable.
Riba 29 di November San Nicolas Awareness Project (SNAP) a honra Roberto como un persona hopi aprecia di San Nicolas.
Roberto Geerman tambe yama “Roberto El Gordo que produce”, cu 30 aña di experiencia di radio actualmente ta trahando na GFM 99.9.
Awe dia 31 di December Roberot ta bay presenta “Conteo pa fin di aña” pa di 31 biaha, anto riba GFM 99.9.
