Ban Percura Pa Un Cambio Di Aña Trankil Y Contento
ORANJESTAD (AAN) – Diaranzon henter dia tur caminda tabata hopi druk. Specialmente, autonan di personanan cu ta haci compras den supermercado (turista y localnan) a yena completamente e stacionamentonan, y riba caya e trafico druk a mustra mescos cu den cualkier ciudad grandi.
Saliendo for di un negoshi den e mesun edificio di Oficina di Labor, ayera atardi un chofer femenino por poco a dal un peaton, cu na e momento ey tabata canando den e pida caminda small cu el a haya pa pasa.
E señora kier a sali asina den pura, subi un caya hopi druk unda hopi hende tabata bayendo y biniendo pa y for di e supermercadonan, cu no a tuma tempo pa wak si tin hende ta cana, y danki Dios e peaton a reacciona na tempo, cu e por a hala atras. Si no, e chofer a dale. E señora chofer a ripara, pero ni sikiera a pidi despensa y a subi caminda sin mas, y esaki ta algo cu mas hende a mira.
Awe, posiblemente e situacion lo ta mas druk ainda, specialmente mainta te merdia cu e negoshinan ta cera, y tambe pa motibo cu hopi hende ta gusta core caminda un rato, wak cendemento di pagara di e diferente lugarnan cu ta haci esaki riba dia 31 mes.
Ademas, dia 31 tin diferente hende cu foi mainta caba ta gusta dal nan drinks y cu ta core bao di influencia di alcohol. Ta di spera cu e campaña di concientizacion lo duna resultado awe tambe, y cu presencia di polis lo trece mas respeto den trafico.
Aña 2009 ta cera cu un saldo di 18 persona morto den trafico. Cada un caso riba su mes a presenta un dolor inmenso pa e famia concerni, y pa comunidad tambe e tabata un impacto emocional hopi duro.
Ban purba haci nos maximo esfuerzo awe, pa percura pa e cambio di aña ta uno trankil y contento pa tur hende riba nos pida baranca.
Ban corda con valioso nos bida ta y e bida di nos semehantenan, e bida di tur esun cu ta cana riba caminda sea pa necesidad of pa salud, pa tene e curpa den condicion y e bida di tur automobilista cu lo ta moviendo riba caminda despues di cambio di aña, kizas pa bishita amistad, famia of pa recrea un rato.
Mescos ta conta pa cendemento di pagara y otro tipo di vuurwerk. Ban ta cauteloso, y muy en particular cu nos muchanan. No bira culpable, pa motibo di descuido involuntario, di kemadura mahos pa bo mes of pa bo yiunan, un familiar, un bisiña, etc.
