Home Cultura Cultura Di Aruba Y Su Tradicion Di Dande

Cultura Di Aruba Y Su Tradicion Di Dande

141
0
SHARE
- Advertisement -

Version revisa 2009

Un di e herencianan cultural di nos historia oral, cu ta resona desde antaño, ta ora Dande ser canta y e contesta “Ai Nobe” ta sigui. Transferi di generacion pa generacion pa e epoca actual, e ta resona manera un eco di pasado. 

Na final di aña tin dos ocasion special cu nos ta celebra. Pasco di nacimento, nos ta desea otro paz y felicidad. Aña Nobo, cambio di aña, cu yen di optimismo nos ta desea otro un bon, feliz y prospero aña nobo. Nos ta habri aña yen di optimismo, bon intencion y propositonan positivo.

   Dande ta un di e tradicionnan folklorico di Aruba. E isla di Aruba conoce e tradicion musical aki ya pa mas cu un siglo. Considerando e isolacion y limitacion geografico di Aruba e musica aki a desaroya un estilo tradicional, un estilo tipico di Aruba. “O, Dande nos a yega na bo porta”. Cu e frase aki e cantante di Dande ta saluda e famianan Arubiano, 31 di December, despues cu 12‘or bati.             

  E palabra “Dande” probablemente ta significa “bay di un lugar pa otro” of “diberti”, un posibilidad ta tambe cu e ta un saludo. Net despues di mei anochi e musiconan ta bishita casnan di famianan den cual nan ta canta un serenata cu e mihor deseonan pa cada miembro di e famia. Tambe nos por considera e Dande un saludo pa e aña nobo. 

   Un di e cantantenan mas bieu di Dande ta Willem Serverius Geerman, naci na aña 1836 (mihor conoci como Pa Wimpy Maduro, fam di su tata ta Maduro). Otro “Danderonan” hopi conoci, di antes ta: Jaco Vos, Jan Geerman, Lee Krozendijk, esnan di fam Panneflek, esnan di fam Ming Maduro, Mo-Tito Croes (naci na1894) y esnan di fam Willems (tur di siglo 19). Di ‘Pa Wimpy Geerman’ (1836) sigui pa generacion despues, nos ta yega na Goy Ras (1906), Vicente Ras (1930) y Bertrando Thiel (1966).    

Rudolf Boekhoudt (naci na aña 1927) ta un conocido tocado di acordeon pa Dande.

  Un otro historia di e origen di Dande ta cu Dande a origina despues di 1836 na Savaneta, unda na aña 1860 Dande a ser composita y canta pa Jan Leoncio Pieter Koolman Jr. (q.e.p.d.). Commandeursbaai tabata un di e promer lugarnan unda e colonialistanan y gobernantenan di Aruba tabata biba, despues Oranjestad a bira capital (haf nobo) di Aruba y e sede di gobernacion. Antes tabata usa un instrumento musical so, esta un “tambu” y tambe tabata toca musica di Tambu. Tambu ta un instrumento di origen Africano. Despues musica di Dande a “plama” pa entre otro Santa Cruz, Noord y Paradera. Otro fecha cu ta ser menciona ta cu na 1863, despues di abolicion di esclavitud, Dande y Tambu a origina y den e alegria di emancipacion a sigui desaroya. E  tabata existi promer, pero no tabatin restriccion manera riba Tambu, cu tabata ser toca den secrecia. Manera ya menciona tabatin mas musiconan di Dande, na diferente lugarnan na Aruba, pero como no tabatin medionan di comunicacion diponibel manera awendia (radio, television, corant, telefon, internet etc.) no a registra tur e diferente musiconan, pero si e musica  tabata popular (conoci).  

   Mescos cu otro tipo di musica tambe Dande tin su desaroyo y cambionan. E versonan di e cantica a cambia y tin diferente version. Tin Dande cu versonan largo cu su parti tristo y su parti alegre, pa alegra curazon di esnan cu ta scuche. E texto di e cancion ta ser adapta  na e lugar y e momento especifico (tempo y contexto) di e toca, tin cantante ta improvisa y segun e ta canta ta pasa cu sombre rond den cual tabata deposita moneda di  cen preto y placa gai. Cen preto y placa gai tabata ser considera moneda di suerte.

Awendia ta hopi mas placa (pa trece bon suerte?)  ta envolvi den e paranda di Dande.

  Antes tabata usa tres instrument so, esta Fio, Tambor y Wiri (raspa metalico). Tambe sa usa un Raspa (traha di calbas). Tambor tin cuero (di bestia chiquito) dos banda, Tambu tin cuero na un banda so y ta ser toca cu man. Despues di tempo tambe a cuminsa usa instrumentonan manera Maraca, Marimba (un caha cu un buraco cu tres o cuatro plachi di metalnan riba dje), cuarta (procedente di Europa pa Venezuela) y tambe tin algun musico ta usa guitara y Acordeon. E trahadornan cu a bay traha na Cuba (1917-1922) a trece algun di e instrumentonan aki, manera guitara y maraca, cu despues a bira popular y tambe un parti esencial di musica Arubano. Tabatin diferente tipo di Dande, por ehempel Dande cu Tambu, Dande cu Fio, Dande cu Tambor y tambe Dande cu Sinfonia di Man. 

   Den luna di November preparacion tabata cuminsa ya cu tin tocador ta cuminsa controla y prepara nan intrumento y si ta necesario haci reparacion (e.o. cambia cuerda o cuero). Ta cuminsa train Dande y otro piezanan segun fin di aña ta yegando. Na e casnan cu ta ansioso pa ricibi Dande (si no tin luto) ta cuminsa traha boyo di maishi di rabo (Sorghum bicolor), pa ta cla pa dia 31 di December. Un bon sopi di bestia chiquito ta ser prepara y tambe antes tabata tin e rom, coecoei, jenever y bols pa asina ricibi e tocadornan y bishitantenan.

   Tabatin di nos antepasadonan cu ta usa e siguiente ingredientenan pa traha coecoei (cucui): e parti abao blanco di e blachinan di mata di agave (Agave sisalana, tin hende ta yame cucuisa) fermenta cu rom blanco puro y pa e color cora ta usa fruta di tuna (Opuntia elatior). Ta corta e blanco di e blachinan y dera nan den tera cu carbon di palo, pa nan horna pa un anochi. Despues ta sace y cole, ta saca un awa manera stropi, mescla esaki cu rom blanco (sin holor), pone tiña di fruta cora di tuna y cole un biaha mas. Un otro manera pa prepare ta, cu ta usa e siguiente ingredientenan: cawara chiquito fermenta cu rom blanco puro, menta, sucu y sea ta usa tinta di color berde of cora (awendia). E tipo di agave (Agave sisalina), tambe yama sisal pa cabuya, tin un ingrediente cu yama agavose cu ta haci hende bira burachi (roes). Di esaki e Aztecanan ta traha pulque of octli.

  E Tocadornan di Dande ta train pa ultimo biaha e anochi di 31 di December, bay cas un rato pa habri 12 ‘or na cas y tuma bendicion di mayornan. Na cas nan ta saborea nan sopi cu boyo, dal un brindis y despues reuni pa cuminsa cu e paranda di fin di aña. Antes tabatatin  paranda di Dande cu ta dura di 12.30 ‘or 1 di januari te dia 6 di januari 12 ‘or di anochi. Di cas pa cas ta pasa cantando pa un y tur, pa hende grandi y muchanan por haya un bon aña. E tocadornan di Dande tabata bati porta, toca dos pieza, ricibi cen preto y placa gai y dal nan brindis di aña nobo. Dia 6 di januari, dia di Tres Rey (Epifania), e paranda ta termina, despues e grupo ta reuni un biaha mas pa parti locual a ser colecta (placa).

  E sombre tabata keda yen yen di placa y leu a leu tabata tin hende cu ta tira placa di papel den e sombre. E cantantenan tabata haya mayoria di e placa ya cu despues di e trabao duro di cantamento nan tabata perde nan stem pa algun dia largo.

E tradicion di Dande, e cuminda y bebidanan ta costumbernan cultural tipico di Aruba, cu ta di gran importancia pa nos identidad cultural. Dande ta ancra den curason di hopi di nos hendenan y ta forma parti di nos patrimonio historico y cultural. Un Bon Aña Nobo!

 

drs. Vilmio Wester,

version original 6 December 2007.

version revisa, 4 December 2009.

(Datonan ta cortesia di Departamento di Cultura Aruba (DCA)

- Advertisement -

DUNA COMENTARIO

Please enter your comment!
Please enter your name here