Home Policial Den Bario Di Primavera Tin “Plaga” Pero Di Ladronicia!

Den Bario Di Primavera Tin “Plaga” Pero Di Ladronicia!

0
0
SHARE
- Advertisement -

ORANJESTAD (AAN) – Noticianan oficial tocante e temor cu e habitantenan di Primavera ta biba cune, no ta sali den publicidad, pero papiando cu un par di personanan biba den e bario, ta simplemente un “plaga” di ladronicia ta rondona nan.

Riba su mes, e bario ta uno hopi trankil. Cada famia ta biba den su cas, y no ta tende ningun tipo di problema, pero ora bo cana anochi den cualkier di e hanchinan den e bario, cual ta basta pobla, si por nota cu tin yen di cacho los den cura, y cu ta blaf mahos y ta spanta hende.

Pero no tin otro opcion! Esnan cu no tin cacho ni un forma efectivo di alarma, si ta pasa den hopi mal momento, ora cu ladron ta drenta cas y plume. Poco dia atras, ta un famia Hulandes cu a haya nan mes confronta cu e sorpresa cu ora nan a bin cas despues di trabao, no tabata tin nada, pero nada den dje.

Con por ta? Ladronnan a drenta manera ta nan ta doño di e cas, nan a bay cu tur cos, pues a laga e cas limpi, limpi, pero di bashi…!

Y no ta e prome caso, ta hopi famia a yega di pasa den e mesun experiencia aki, y ta jammer cu esaki ta sosode den oranan di trabao, y muy posiblemente esnan cu ta drenta den e casnan sa masha bon cuant’or e famia completo ta sali foi cas y cuant’or nan ta drenta. Y nan sa tambe cu bisiñanan na banda y dilanti e cas, ta traha kizas cu mesun horarionan, di manera cu ta masha dificil pa un vigila pa e otro.

Yen di autonan straño sa pasa rond, ta para dilanti e casnan pa un rato largo, pero esey no ta suficiente pa yama polis tampoco, y menos sabiendo cu KPA tin poco hende pa traha y cu tin casonan hopi grave cu ta tumando lugar, cu tin prioridad pa polis.

Tin personanan cu si nan logra wak hende den auto cu ta actua sospechoso, nan ta tuma e number pa “por si acaso” algo sosode, a lo menos tin un pista pa polis.

Ta suppose cu a pone polis den algun bario, pa nan ser conoci cu tur e habitantenan, pa nan encurasha bisiñanan pa forma un union, pa entre otro, lucha contra ladronicia. Pero e polis cu ta concerni e Bario di Primavera, ta parce cu no ta ni conoci pa e mayoria di habitantenan di e area aki. Pero ladronicia ta sigui sosode keto bay, hendenan ta perde nan pertenencianan, y haya nan ta practicamente un mision imposible, ni mas cu cuanto marca di dede y demas, cu por yuda polis sigui un pista, no ta efectivo.

Esnan cu por cumpra un cacho bravo y cu tin e medionan suficiente pa manten’e pasobra nan ta hopi costoso, ya cu nan ta delicado y mester di e mesun cuido cu bo ta duna un mucha for di baby bay ariba, a opta pa esaki. Unda cu tin cacho bon entrena, cu no ta acepta cuminda di hende straño y cu ni riba acera hende por pasa cana, pasobra nan ta bira loco cu ta spanta bo, sigur ladron no ta drenta! Pero no ta tur famia na Primavera kier of por busca e alternativa ey, cual realmente ta mehor cu cualkier otro tipo di seguridad of alarma.

- Advertisement -

DUNA COMENTARIO

Please enter your comment!
Please enter your name here