Diario Online

Den Cuerpo Policial Tin Algun Elemento Cu Ta Un Berguenza Nacional

Publication: Thursday, 31 December 2009. Categoria: General,Judicial

Sin generaliza, Abogado mr. Duijneveld ta haya cu:

ORANJESTAD (AAN) — No obstante su criticanan riba e sistema di Ministerio Publico na Aruba, mr. Duijnevel no a generaliza y a expresa su opinion riba PG, ken e ta considera un persona capacita.
Tampoco e ta mira henter Cuerpo Policial como corupto, pero si tin cierto elementonan cu e ta considera un berguenza nacional.

“ Nos mester tin tur confianza den nos sistema hudicial pa nos por drumi trankil. Personalmente, mi ta kere cu den e Procurador General actual nos tin un hende cu tin capacidad, pero tambe e tin hopi trabao pa haci den su mesun cas. Nos tin polis hopi bon y di calidad halto, algun di nan bon amigo di mi. Pero, lamentablemente, tambe nos tin elementonan cu ta un berguenza pa nos pais Aruba, trahando den husticia”.

E abogado a referi tambe na Minister di Husticia nobo, esta mr. Arthur Dowers.

“ Nos minister di husticia nobo mester cuminza actua y mustra pueblo cu e si lo no acepta ningun tapamento di cosnan inaceptable, cu ta pone husticia na Aruba pa loke e, como persona responsable awor, den un luz hopi negativo, y laga nos pueblo sin confianza den nos sistema hudicial y cu temor.

“ Mi amigo Arthur, atencion pa trafico ta hopi bon, pero por fabor, tin asuntonan hopi mas importante y grave pa atende riba tereno di husticia, y si nan por worde drecha, por ta nos pueblo por drumi trankil back. Pero aworaki mi ta bisa, si nos ta wak kico ta pasando, si nos ta wak manipulacionnan di hasta Hueznan, pa nos cera hende, nos ta bezig den un caminda hopi robes.

“ Tambe mi ta bisa, nos ta wak nos celnan di polis con hendenan ta pasa door di dje, con abogadonan no por tin acceso drecho na nan cliente, pa nan papia cune, mi ta bisa tin hopi trabao pa haci!”

Duijneveld a remarca cu a bira tempo pa nos sistema hudicial worde drecha. “Awor tin un tempo nobo cu un minister nobo, un biaha mas mi ta haci un apelacion na dje pa tuma e pasonan necesario y si cabes tin cu bula, laga nan bula, pero no sigui cu e maneho cu tin aworaki.

Finalmente, el a señala cu pa locual nan a yame den Corte dia 11 di Maart e no tin ningun miedo, e lo no cera su boca pero lo sigui bringa pa su clientenan na kendenan el a duna nan danki pa nan sosten. “Kere mi, lo mi sali cu mi cabes na halto dia 11 di Maart 2010, ora mi tin di subi Raad”, e abogado a subraya.