Home Politica Desaroyo economico ta bira un esfuerso den grupo

Desaroyo economico ta bira un esfuerso den grupo

1
0
SHARE
- Advertisement -

avpmichelleMinister di Asunto Social, Asunto Economico y di Cultura
Despues di hopi aña sector priva y publico ta na mesa atrobe
ORANJESTAD (AAN): “Nos kier pone accion tras di nos palabranan. Nos a bisa semper cu hunto nos ta bay drecha nos economia y awe nos a pone e prome piedra”, asina Minister di Asunto Social, Asunto Economico y di Cultura a bisa na final di e prome reunion cu esnan den e sector aki. Minister Michelle Winklaar a reuni siman pasa den un grupo cu a conta cu participacion activo di Departamento di Asuntonan Economico, Camara di Comercio y cu directiva di ATIA.


Meta di e reunionnan aki ta pa hunto deliña un maneho riba con mihor nos lo crea oportunidadnan nobo pa incentiva nos economia. “Ami ta kere hopi den participacion. Y un union entre organizacionnan publico y priva lo por yuda masha hopi”, segun Minister Michelle Winklaar a enfatisa.

Manera ta conoci, un siman atras caba Departamento di Asuntonan Economico a presenta nan plan Aruba 2025 den un evento bon atendi den Radisson Resort, na unda tanto Camara di Comercio pero tambe ATIA tabata presente.

Hunto cu e plan aki Camara di Comercio tambe tin un bon plan hinca den otro y mescos ta conta pa e organizacion di comerciantenan ATIA cu tambe tin un lista di recomendacionnan y sugerencianan. Na tur e Minister di Asuntonan Economico awor tin tres plan riba mesa pa asina hunto prepara un solo direccion pa nos economia y cu sosten di tur e partnernan envolvi.

Nos ta referi aki na un plan a termino corto, termino mediano y un plan a termino mas largo.
“Awor ta keda pa nos pone e plannan aki hunto, incluyendo esunnan cu nos partido a stipula den nos plan Aruba Ariba pa asina yega na e plan stategico cu nos lo hiba den e añanan nos dilanti”, segun Minister Winklaar.

 Ta remarcabel cu den pasado no tabata tene e tipo di encuentronan asina y e organizacionnan economico tabatin acceso masha limita na e Minister of Gobierno general. A acorda cu den 2 siman e grupo lo topa atrobe y e lista di accionnan cu mester tuma lugar lo worde fiha a base di e tres plannan cu tin riba mesa awor.

Un idea cu a resalta tambe durante di e reunion aki, ta pa duna incentivonan fiscal na negoshinan cu ta duna nan personal training. Door di duna training nos ta trahando riba mehoracion di calidad y servicio y pa stimula e cursonan di training y upgrading mas tanto posibel, lo por pensa riba un “tax-incentive”.

Esaki ta djis un ehempel di e serie di ideanan cu a sali di e “think tank” durante e prome encuentro. Minister Michelle Winklaar a sigura cu e grupo aki lo bira un “think tank” pa su maneho y lo reuni a base regular pa hunto analisa y actua mesora riba oportunidadnan nobo cu lo por presenta pa cu nos economia.

A acorda tambe cu den e siguiente reunionnan lo envolvi tambe San Nicolaas Business Association pa atende tocante desaroyo specifico pa pariba di brug y AHATA pa desaroyo di e sector turistico y di hotelnan.

Hopi a yega di papia di diversificacion di nos economia pa baha e dependencia cu nos tin riba turismo, pero masha poco a ser haci pa por logra yega na un diversificacion real. E Gobierno nobo ta convenci cu trahando hunto, tanto sector publico como priva, cu hunto nos lo por logra metanan comun y sobrepasa obstaculonan den e trayectoria pa logra un desaroyo economico sostenibel pa Aruba.

- Advertisement -

DUNA COMENTARIO

Please enter your comment!
Please enter your name here