Dialogo Social Ta Bay Ta Hopi Importante
ORANJESTAD(AAN): Durante conferencia di prensa di fraccion di AVP, Parlamentario René Herdé a trece dilanti cu un di e argumentonan di parti di fraccion di MEP cu ta critica e hecho cu AVP kier kita prome 1,5% di BBO y despues elimina, ta cu AVP no a presenta ningun rapport pa hustifica e bahamento di 1,5% di BBO.
AVP a presenta rapport prome cu introduccion di BBO.
E argumentonan uza den e rapport prome, ta valido te awe.
Si bo wak analisis di Banco Central y con costo di bida a subi specialmente pa e gruponan mas vulnerable, no tin mester di mas argumento.
Esaki segun Herdé, kende a sigui bisa cu Banco Central prome cu introduccion di BBO a bisa cu BBO ta bay tin un efecto inflatorio di mas cu 8%.
Inflacion na 2007 tabata rond di 10% y 2008 el a yega 11%.
Ora bo analisa e inflacion bo ta wak e efecto grandi cu BBO tabata tin den dje.
Un di e otro argumentonan di MEP contra eliminacion di BBO ta cu e no tin un sistema di control.
E argumento aki ta uno politico y ta netamente e argumento cu sindicatonan a uza prome cu a introduci BBO.
Awor e hendenan cu a introduci BBO ta uza e argumentonan aki.
Segun Herdé, AVP a bisa cu den e tres schakelnan bo tin un ‘ingebouwde controle’, cu ta nifica cu esun cu bay cumpra e producto a por ehempel un ‘wholesaler’, ta exigi e rebaho di 1,5%.
E control mas efectivo no ta e control cu e ambtenaar ta bay haci den e supermercado, sino e control cu nos ta haci den cada stap di e schakel di bende y duna servicio y producto.
Esaki segun e parlamentario kende a sigui bisa cu ariba di dje tin tambe loke e ta yama “bista di pueblo”.
“Ami no ta kere cu lo por tin ainda dunadornan di trabao, empresarionan, cu den e situacion aki na Aruba no lo kier reduci gasto pa nan bende mas”, segun Herdé.
El a sigui bisa cu fraccion di AVP a urgi y Gobierno a cuminza cu e discusionnan caba, pa e dialogo social entre empresario y sindicatonan.
“Mi no ta duda cu e discusion ariba reparticion di entrada, stabilidad di trabao, stabilidad economico y financiero, tambe pa famianan lo ta central den e discusion di e dialogo social”, segun Herdé.
Esaki ta nifica cu tur hende na mesa, representante di trahadornan, Gobierno y dunadornan di trabao lo tin riba mesa con ta bay reduci gasto, con lo haci e forza di compra di trahadornan di famia mas mihor, pasobra ora e ta mihor e ta mihor pa nos tur.
