Home Hudicial E 74 empleadonan di the Aruban Resort cu a firma cu di...

E 74 empleadonan di the Aruban Resort cu a firma cu di FTA mester haya pago

6
0
SHARE
- Advertisement -

arubanresortProme cu diabierna 9’or di mainta, sino e resort ta bati bancarota
ORANJESTAD(AAN): Diaranzon FTA representando 74 trahador di The Aruban Resort a bay corte pa pidi huez pa declara e hotel bancarota. Abogado Figaroa representando e empleadonan a splica DIARIO cu despues di 6 luna di problema, e empleadonan a haya cu ta basta. Durante ultimo lunanan e empleadonan tabata wordo paga laat y actualmente e ultimo pago completo cu nan a ricibi tabata dia 28 di October.
Siman pasa nan a haya tambe 20% di nan salario di November y despues e cranchi a cera, apesar di tur sorto di promesa hasi pa e compania cu tabata maneha e hotel.

Coriente a wordo corta pa Elmar Diamars y e turistanan mester a wordo evacua pa otro hotel.
A yama e empleadonan di e resort despues pa bin busca cuminda cu e hotel tabata tin, cu no lo wordo uza mas.

E empleadonan kendenan no ta sigur cu nan lo haya placa pa nan por hasi compras pa nan famia, a bay masalmente na e resort y eynan nan a haya pisca, carni, bagels etc pa bay cas cune.

Figaroa a splica cu na dado momento e compania Mericano tabata pidi esnan cu mester hasi pago na e hotel, pa deposita e placa riba cuentanan na Merca, pa asina nan lo por tin e placa aki na Merca y asina nan no tabata cumpli cu nan debernan na Aruba.

Eynan FTA y e empleadonan a haya e ‘feeling’ cu e hendenan aki tabata buscando tur manera di tene e placa pa nan mes.

FTA a dicidi cu no tin otro opcion cu pidi bancarota di e hotel, pasobra asina sikiera e empleadonan lo haya nan cesantia paga pa SVB.

Importante ta cu Gobierno a hasi cierto promesanan, cu nan lo ta dispuesto di duna cierto garantianan pa e hotel por sigui funciona, pero cu condicion cu e grupo cu ta manehe actualmente no por tin poder mas den e hotel.

Door di manda e hotel bancarota, automaticamente e poder di e grupo ta wordo kita y e ora ey Curator ta bin den wega.

Na momento cu esey sosode, Gobierno ta dispuesto di duna garantia na e hendenan cu nan lo wordo paga por lo menos 3 luna di salario, mientras cu lo duna garantia tambe na Elmar y WEB pa loke ta e debenan di mas di 2 miyon florin di coriente y awa.

Despues cu The Aruban Resort wordo declara bancarota, Gobierno lo acerca Parlamento pa nan aproba cierto garantianan cu nan lo kier duna den negociacion cu e curator, pa cu e empleadonan y e otro debenan.

Gobierno lo acerca inversionistanan pa nan tuma over e hotel, pa asina tur operacion por sigui.
DIARIO a puntra Figaroa tocante e hecho cu tin un grupo di empleado di e resort cu no a firma cu FTA.

El a splica cu awor tin yen otro abogado den wega y señor Vink cu antes tabata den management di e hotel.

E abogado a splica cu si FTA no a pidi pa bancarota, ningun otro hende lo a lanta for di soño.
Actualmente tin un grupo di trahadornan specialmente di e parti di timeshare cu a acerca abogado Dello Gomez, pasobra nan ta prefera pa e hotel no bati bancarota.

Esaki quizas a wordo influencia pa e grupo di Hans Vink cu lo kier inverti den e hotel.
E tipo di promesanan aki a bin dilanti pa 6 luna largo caba.

FTA y e empleadonan ta dispuesto pa coopera cu cualkier promesa, basta e empleadonan wordo paga nan placa.

Awor no ta bay para nada, pasobra a scucha storianan bunita. Si e grupo kier pa e bancarota wordo para, nan tin cu paga e empleadonan nan placa.

Despues cu FTA a sinta negocia casi 5 ora largo cu e grupo di Hans Vink pa e trahadornan wordo paga, a dicidi di bay corte, pero duna e grupo di Vink te cu 3’or di atardi Diaranzon, pa paga e trahadornan.

E grupo di Vink a pidi huez Diaranzon pa duna nan te cu Diabierna of Dialuna pa e grupo nobo por paga Pa loke ta esnan cu a firma cu abogado Dello Gomez, segun Figaroa nan practicamente a uni nan mes cu e grupo cu a firma cu Vink.

E grupo aki pues tin e intencion di evita bancarota, pa nan por negocia cu e compania KL cu ta esun responsable actualmente cu operacion di e hotel, pa nan por tuma over e operacion.
Huez den corte Diaranzon a bisa cu e ta duna te Diabierna mainta 9’or, pa e empleadonan ricibi pago.

Unico manera cu nan lo por para bancarota pues, ta si entre Diaranzon y Diabierna 9’or di mainta, nan paga e 74 empleadonan di FTA nan placa. Si esey no sosode, Diabierna 9’or di mainta Aruban Resort ta bay bancarota.

Apesar cu e otro grupo di trahador di the Aruban Resort ta consisti di alrededor di 130 trahador, e grupo di Vink y Dello Gomez mester djis cumpli cu pago di salario di e 74 trahadornan cu a firma cu FTA, pa para e bancarota. Esey ta e condicion.

Pues en principio e grupo nobo lo no mester ni cumpli prome cu Diabierna cu pago di salario di tur hende.

Basta nan paga e placa na e 74 empleadonan cu ta cay bao di FTA, e bancarota lo wordo evita.
KL tambe a manda un abogado corte pa purba para e bancarota, pero segun Figaroa un biaha mas KL a bin cu promesanan cu nan ta buscando un hende pa inverti etc., pero e empleadonan no kier kere mas den e storianan ey.

- Advertisement -

DUNA COMENTARIO

Please enter your comment!
Please enter your name here