Home General Edjean A Bolbe Impacta Cu Su Concierto “Hey, Ta Pasco”

Edjean A Bolbe Impacta Cu Su Concierto “Hey, Ta Pasco”

5
2
SHARE
- Advertisement -

edjean10ORANJESTAD (AAN) – Tin un famoso propaganda di un producto cu ta bisa “Lo bueno se hace esperar” y e frase aki a bira uno hopi popular den boca di hende, y aki na Aruba tambe sa tin ken ta use.

Wel, esey ta loke a sosode cu “Hey ta Pasco” diasabra anochi, cu pa motibonan tecnico inespera, e publico warda pa Edjean un rato, pero ora el a bin riba escenario (por cierto su salimento riba stage tabata algo impecable) ya caba e publico a cambia su impaciencia pa energia y e ambiente a transforma di biaha den aplauso, y tur otro tipo di expresion di alegria y sosten pa e artista.

Un concierto berdad espectacular! Edjean cu su voz unico, su style, su carisma ta gana mesora e curazon di tur hende, y como tur un profesional, el a sa di maneha e situacion cu, fuera di su alcance, a surgi.

Edjean a ofrece nos su ultimo version di “Hey, ta Pasco” (manera el a anuncia) henter un pakete di calidad halto. E publico a emociona, hari, los un par di awa di wowo, los pia, bula mes, canta, wel “e locura total” den e bon sentido di e expresion.

Su repertorio fabuloso a cay na agrado total di e publico, como tambe e presentacion di su ruman Jeanedy, cu sigur a crece como artista. E mucha muher a laga hopi hende cu boca habri, di con el a madura riba escenario. Cantando den duo cu su ruman el a conmove nos; e tabata masha, masha bunita mes.

Un parti di e show tabata interactivo cu e publico, un acierto sigur, unda mas cu un braza y sunchi Edjean a haya, di hendenan cu ta stime. No solamente e calor humano e hoben por a sinti meymey di e publico, pero tambe e demostracionnan di orguyo cu na Aruba tin artistanan hoben di e taya di Edjean Semeleer.

Tabata tin un momento cu el a canta un potpourri di musica crioyo di Aruba, honrando asina e autornan di e cancionnan, y a set up algun cantica popular infantil, cu desde esun di mas grandi te esnan chikito cu ta bay creche ta siña. E publico a lanta para, aplaudi!

Great tabata cu e aña, segun e mes a bisa, pa prome biaha hunto cu su mayornan, su wela tambe tabata presente.

E duo di Daddy y Tony a trece un nota diferente. E publico a bira practicamente euforico cu nan presentacion tremendo. Dos artista sin duda hopi keri, sumamente gusta, y cu ademas di e voz impresionante cu cada un y den duo nan tin, pero pa e forma cu nan ta trece e show dilanti, cu ta laga hende hari, pero tambe reflexiona riba cierto mensahenan cu nan ta laga los.

Na final di nan presentacion Edjean a sali for di e publico cu su microfond den man, haciendo trio cu nan, cu e cantica “Spar bo amor” y algo masha bunita ta cu Edjean tabata tin un ramo di flor pa ofrece e dama.

E espacio aki ta mucho chikito pa papia di e grandi cu e show tabata. Por cierto, Edjean a canta un cantica cu a carga hopi hende cu emocion, cual e ta dedica na Jesus y cu ta mustra cu E tey pa consola un y tur y cu nunca un hende ta su so si nos conoce Jesus.

E concierto a conclui cu Gozadera y esnan cu no tabata presente, ta djis pone nan imaginacion traha un rato, anto asina mes! E publico a bay cas cu stem gasta y pia cansa, pero sumamente contento y satisfecho. No por keda sin menciona e tremendo orkesta, e coro, e grupo di hoben cu a balia cu a complementa e show asina bon.

Pabien Edjean pa e show tremendo aki y danki pa a laga nos pasa un par di ora inolvidable y feliz.

- Advertisement -

2 COMMENTS

DUNA COMENTARIO

Please enter your comment!
Please enter your name here