Home Economia Gobierno Ta Bay Pone Un Paro Na E Empobrecimento Nacional

Gobierno Ta Bay Pone Un Paro Na E Empobrecimento Nacional

1
0
SHARE
- Advertisement -

mikeORANJESTAD (AAN) – Den conferencia di prensa di gobierno, Minister Presidente mr. Mike Eman a señala kico ta e importancia di eliminacion di BBO, cuminzando cu 1.5% entrante 1 Januari 2010, y e otro 1.5% entrante 1 Januari 2011.

Premier Eman a bisa cu analizando con e poder di compra den nos comunidad a desaroya su mes, durante e ultimo añanan, un rapport di Oficina Central di Estadistica (CBS) ta mustra, den un investigacion tocante presupuesto familiar na aña 1998 y otro igual na aña 2006, cu e poder di compra di esnan cu entrada promedio na Aruba, prome cu e introduccion di BBO a bay atras cu 16% y esnan di menos recurso a bay atras cu casi 30%. Kiermen, cu esnan cu tin un entrada bao di mil florin e perdida tabata di casi 30%.

“ Si bo pone acerca e efectonan inflacionario cu BBO tabata tin durante 2007, 2008 y 2009, por imagina nos mes cuanto e empobrecimento nacional na Aruba tabata, durante e ultimo añanan.

“ Nos gobierno a compromete su mes cu nos ta bay pone un paro na empobrecimento di nos pais, y nos ta bay cuminza cu un maneho cu hustamente ta bay fortifica e poder di compra di nos conciudadanonan.

“ Y awe, e ley aki ta un otro paso pa fortifica e poder di compra di nos conciudadanonan, duna nos pueblo un alivio, y na mesun momento nos ta sinti cu e kitamento di BBO ta bay baha tambe e costonan di produccion di e empresanan, creando asina un tiki mas rosea pa empresarionan por inverti mas y por duna un aumento di salario”, segun e mandatario.

Minister Presidente a agrega cu tur su coleganan minister a contribui na e ley aki, cual ta nifica tambe cu e entrada pa pais Aruba cu un parti tabata e BBO lo bira menos, pero trahando cu reduccion di gastonan proyecta for di awor pa 2013, lo cera e buraconan aki y lo percura tambe cu pa medio di e alivio aki lo tin un estimulo economico cu lo tin su refleho atrobe, den e entradanan di gobierno.

“ Calculacionnan di economistanan tambe ta mustra cu di momento cu bo pone BBO calcula na 152 miyon total di entrada, ora bo ta parti den dos ta 76 miyon menos na entrada pa caha di gobierno, pero e simple hecho cu bo ta laga 152 florin den e economia e ta trece bek 35 miyon florin bao di otro impuestonan, pa motibo di e efectonan catalizador y economico cu lagamento di tanto placa den e mercado ta bay crea”, Premier Eman a subraya.

Segun e mandatario, e buraco cu gobierno lo tin cu cera lo bira cada bez mas chikito. “Esey nos ta splica den e comentarionan riba e ley aki, con durante e siguiente añanan nos lo bay haci e ahustenan necesario, pa percura pa e buraco ey tambe worde cera, unda cu nos ta logra dos meta: un presupuesto den un balansa mas husto cu e impuesto riba pueblo ta menos, pero e gastonan di gobierno ta worde reduci, pa asina e peso cu gobierno tin riba comunidad tambe ta baha simultaneamente”, Premier Eman a remarca.

- Advertisement -

DUNA COMENTARIO

Please enter your comment!
Please enter your name here