Problema serio na Groningen
ORANJESTAD (AAN): Diahuebs anochi, un transformator-huis den ciudad di Groningen na Hulanda a kima, y esaki a pone cu gran parti di e area a bay den scuridad. Dado momento, como 16.500 cas a keda sin coriente, y net awor cu sneu ta cay y ta haci hopi frieu mes. Coriente a bay banda di 5:30’or (ora di Hulanda). Te banda di 7:30 p.m. a logra di paga e candela den e transformator-huis aki.
Algun area cu por a bay bek riba red di coriente, a haya esaki despues. Pero banda di mey-anochi, como 4.200 cas ainda tabata sin coriente.
Mirando e peligro di frieu inmenso aki, varios centro di crisis a worde habri pa asina esnan den problema por bay busca refugio. DIARIO a haya sa, cu varios Arubiano (incluyendo studiante) a pasa un anochi den scuridad, y frieu inmenso. Esey ta debi cu no tin sistema pa keinta cas of kamber tampoco.
