Home Hudicial Huez a nenga peticion di fundacion parke Nacional Arikok,

Huez a nenga peticion di fundacion parke Nacional Arikok,

0
0
SHARE
- Advertisement -

Pa stop cobamento den parke
ORANJESTAD(AAN): Riba 17 di November na corte a tuma lugar un caso sumario entama pa Fundacion Parke Nacional Arikok contra e compania Pakinam, cu tin algun decada caba ta hasi trabao di cobamento den e area di e parke. Awor cu tin cierto regla pa loke ta maneho di e parke, e cobamento a bira un problema. Specialmente mirando e hecho cu algun luna pasa un ex Minister a acorda e ley nobo, mientras cu un otro ex Minister di e mesun gobernacion a firma un acuerdo pa Pakinam sigui coba den e parke.
E fundacion na mas cu un occasion a acerca polis pa para e compania di coba, pero pakinam semper tabata tin den su poder e documentonan pa mustra cu nan tin derecho di coba.

Abogado di Pakinam mr. Braam a trece dilanti cu Pakinam a haya permiso di Minister di gobernacion anterior pa sigui cu e trabaonan di coba, pero e Minister di gobierno nobo a manda un decision nobo pa mustra cu e no ta di acuerdo cu decision di e Minister anterior, pues e kier pa e cobamento stop.

Pesey e fundacion a cuminza e caso y mientras cu decision no cay ainda, e trabaonan di cobamento a para un rato. Huez a bisa cu e lo duna su veredicto riba dia 2 di December.

Braam a bisa sinembargo cu e decision di huez lo no ta decision final, pasobra e decision di e Minister actual pa hala aden e decision di e Minister anterior por bay ainda den LAR.

Esaki ta nifica cu ainda lo por tin un trayectoria basta largo pa bay cana.
DIARIO a puntra e abogado ki defensa el a trece.

Segun mr. Braam, su defensa tabata cu Minister Croes a tuma un decision basta cla y motiva, caminda cu el a evalua tur e importancia y el a haya cu Pakinam por sigui cu su trabaonan, pasobra Pakinam tin mas di 30 aña ta hasi su trabaonan eynan.

Braam a sigui bisa cu mirando tur esaki, e Minister actual no por bin di un dia pa otro y bisa cu Pakinam tin cu stop, usando motibonan fofo.

Den corte segun Braam, abogado di Parke Arikok a bisa cu e maneho di duna Pakinam permiso pa sigui coba tabata un asina yama maneho di despedida (‘afscheidsbeleid’), pero esey no ta berdad pasobra ningun hende por tabata sa adelanta con eleccion lo bay.

Segun Braam, e Minister anterior a tuma e decision usando motibonan valido. DIARIO a puntra e abogado riba e otro companianan cu tambe tabata coba den mesun area y el a splica cu tur e otro companianan ya caba a haya un lugar alternativo pa nan por coba.

Pesey Pakinam ta di opinion cu e lo ta dispuesto pa stop di coba den parke, basta e haya un otro lugar pa coba.

Si esaki no ta e caso, Pakinam lo por exigi daño y perhuicio cu por bira un suma basta halto.
DIARIO a puntra e abogado cuanto e compania ta pone den balance, e intencion di proteha e parke.

Segun Braam, e parke ta wordo proteha, pasobra den e ‘verordening’ ta wordo bisa cu e companianan cu ta coba caba por sigui coba, pero nan no mag di coba mas leu.
Loke nan mester hasi y esaki Pakinam tambe ta hasi, ta coba mas profundo.

Door di coba mas profundo, bo no ta causa daño na e parke. Director di Parke Booshi Curiel sinembargo tabata tin e ponencia diferente na di Pakinam. El a splica cu parke tin un ‘landsbesluit’di parke y un landsverordening cu ta pa proteccion di naturaleza.
Esakinan ta duna e parke e derecho di existencia mara na hopi cos cu mester sosode, mientras cu e parke tabata canando pa bira operacional.

Curiel a splica cu for di 2005 e parke a bira operacional. El a bisa tambe cu si e cobamento sigui, esaki ta lanta hopi stof cu ta cay riba e matanan den vecindario y naturaleza ta wordo kibra y esaki no ta recupera mas.

Tambe ta asina cu ambos banda di tur dos di e minanan aki por afecta e fuente of wowo di awa cu tin na Fontein cu ta algo historico.

E parti aki di awa cu ta duna un extra bida na e parti ey di parke, sigur lo seca, si sigui cu e cobamento.

Pega cu esaki tambe tin e pinturanan di Indian den cueva cu por haya reconocimento di UNESCO pa pertenencianan mundial y si e cobamento sigui, esaki por trece e cueva por cay aden pues e ta bira peligroso pa e bishitantenan.

Como cu huez a bisa cu e lo duna su veredicto dia 2 di December, DIARIO a tuma contacto cu corte, pero huez ya caba a tuma decision pa duna su veredicto mas trempan.

DIARIO pues a haya sa cu e veredicto a wordo duna pa huez riba 25 di November, unda cu huez a rechaza peticion di Fundacion Parke Nacional Arikok, pues Pakinam por sigui cu su operacion.

- Advertisement -

DUNA COMENTARIO

Please enter your comment!
Please enter your name here