Introduci BBO Na Un Manera Dictatorial Si Ta Un “Bulldoze!”
Parlamentario Lainda Westerhof:
Cu reduccion di 1.5% ya caba pueblo lo haya un alivio!
ORANJESTAD (AAN) – Den conferencia di prensa di fraccion di AVP, Parlamentario Laida Westerhof a elabora tambe tocante e ley pa reduci te elimina BBO.
El a señala cu e ultimo dianan ta worde bisa hopi, den cierto medio di prensa, cu AVP ta “bulldoze” cu eliminacion di BBO. “Pues, un palabra nobo cu nos a haya”, e dama a expresa.
E Parlamentario a subraya cu ora cu BBO a worde introduci el a causa un impacto negativo pa comunidad, y e reduccion di 1.% lo trece un alivio den e pueblo.
“ El a worde introduci e tempo ey sin trece solucion, sin trece alternativa, awor diripiente ta buscando tur tipo di solucion y alternativa pa no hacie, pa stroba un logro grandi di AVP.
“ Pasobra nos ta un gobierno cu ta un partido cu ta campaña di un cosa y ta goberna mescos. Pa nos campaña y goberna no ta diferente y pesey ta hopi importante pa nos haci e logro aki y asina alivia e gastonan di pueblo”, señora Wsterhof a bisa.
El a subraya cu mundialmente, tin formanan pa cobra impuesto directo y indirecto, e no ta contra di esey.
“ Kico mi ta contra di dje? Ami ta un politico hoben sirbiendo pueblo compara cu tur esnan cu tin hopi aña cu mi ta respeta, caminda cu nan a introduci un sistema cu no tin transparencia. Na comienzo nan a bisa cu nan ta introduci un sistema di BBO, cu na final di aña nos por wak kico a genera y unda e placa a bay.
“ Te dia di awe cu nos a genera por ta un total di 200 miyon Florin, nos no sa unda e placa ey a bay ni den kico e placa ey a worde inverti. Anto eynan mi tin problema cune”, e Parlamentario a acentua.
“ Pero awor bo ta recitando un poesia cu abo so ta interpreta. Nos ta trahando akiden pa bienestar di pueblo, y awor nan ta bisa cu Raad van Advies ta entrega cuatro pagina, y ta tres pagina di cuatro cu tres frase.
“ Tempo cu el a worde introduci ta diez pagina. Hasta Banco Central tabata contra di dje. Pero e tempo tabata manera un estado dictatorial, pasobra ningun hende a worde scucha.
“ Esey ta bulldoze! Nos a biba añanan largo sin BBO. Y naturalmente e prome lunanan mester bin adaptacion, e pueblo mester custumbra back, pero mi ta kere nan lo custumbra cu amor, pasobra e sistema aki caminda cu prijsnan a subi, y e ta cumulativo, riba berdura y fruta tabata tin un aumento di casi 30%, y nos a conoce un inflacion di casi 10%, mi ta contra di esaki”, señora Westerhof a bisa.
El a reitera cu mester compronde cu aworaki nos pais ta bay den cambio. AVP a bin cu un programa y nan ta cumpli cune, pasobra nan ta un partido cu ta cumpli cu su programa.
