Mescos cu 2009, 2010 lo ta un aña yena di reto pero cu lo worde asumi cu positivismo
Minister Otmar Oduber
ORANEJSTAD (AAN): Aña 2009 tabata uno yen di reto, yen di situacion dificil no solamente pa nos pida baranca, pero pa mundo henter, pero tambe e tabata un aña di cambio, un aña di un comienzo nobo yena di speranza pa un mihor futuro pa cada un di nos.
E aña aki pueblo di Aruba a duna nos partido AVP a confianza pa goberna cu mayoria absoluto nos isla pa e siguiente 4 añanan. Nos a presenta un plan Aruba Ariba cu a worde traha a base di hopi estudio y consulta no solamente cu expertonan pero tambe cu pueblo en general, caminda a duna tur e atencion na e aspectonan cu nos sociedad kier pa nan worde atendi. 29 candidato riba e lista berde, hunto cu hopi di boso a traha duro, a papia, a scucha y a demostra e vision, amor y deseo pa un mihor Aruba worde crea. Asina 25 di september, pueblo di Aruba a duna nos e sosten pa logra e vision aki.
A pesar di e situacion dificil den cual nos a haya Pais Aruba, toch asina nos a lora camisa y cuminsa traha, y cu orguyo mi por bisa cu Gabinete Mike Eman I ya caba por tin diferente logronan su tras y promesanan pa un mihor Aruba a cuminsa worde cumpli.
Relacion cu Hulanda y Antiyas a worde drecha, na e momentonan aki por bisa cu ta existi un union grandi entre e partnernan di Reino Hulandes cu no a worde mira pa hopi aña. KLM a anuncia cu nan lo bolbe bula Aruba, Carnival tambe a anuncia cu nan lo regresa Aruba y cu posibilidad pa aumenta nan calls den futuro cercano. Placa pa promociona Pais Aruba den exterior a worde aumenta, relacionnan cu partnernan strategico ta den proceso di worde estrecha. Mester menciona tambe cu shelter den centro di ciudad a worde cera y e adictonan ambulante ta hayando e atencion y cuido necesario pa nan rehabilitacion. BBO lo worde reduci na mitad entrante 1 di januari 2010, bijstand lo conoce tambe un aumento, dunando asina un alivio na esnan cu mas mester di dje. Esaki ta solamente algun di e promesanan, e cambionan positivo cu AVP a priminti y cu Gabinete Mike Eman I a sa di cuminsa cumpli.
2010 lo sigui ta un aña di hopi reto, pero retonan cu nos como gobernante lo sa di asumi cu tur responsabilidad pa hiba Aruba pa dilanti, pa nos isla por tin e bon nomber cu nos tabatin añanan atras, pa Producto Aruba por ta uno di e calidad cu nos y nos bishitantenan merece, pa nos hendenan por goza equitativamente di e progreso di nos isla, resumiendo pa nos tur por bolbe disfruta y goza di nos isla na e mihor manera y pa e sonrisa por bolbe mustra riba cara di cada un di nos bibando riba e pida baranca aki.
Cu henter mi curazon mi ta desea pueblo di Aruba un Feliz Aña 2010, yena di paz, dicha, prosperidad, salud y cu Papa Dios por drama su bendicion den cada hogar.
