Mester Atende Cu Retrazo Di Ontvanger Pa Duna Hendenan Nan Placa Di Belasting
Segun Andin Bikker
ORANJESTAD(AAN): Durante conferencia di prensa di PDR, lider di e fraccion parlamentario Andin Bikker a bisa cu un dolor grandi di pueblo ta cu ta tarda hopi prome cu e haya su placa di belasting back.
Constantemente pueblo ta bati na porta di e fundacion Pro Husticia di PDR, pa puntra kico nan por haci pa haya nan placa.
PDR a recauda mas di 5000 firma caba di personanan cu ta reclamando pa nan haya nan placa di belasting back, pasobra nan tin derecho riba dje.
Segun Bikker, el a yega di haci varios pregunta y ta bay haci esaki atrobe, pasobra e kier sa di Gobierno kico concreto ta worde haci aworakinan pa loke ta trata restitucion di placa di belasting cu pueblo tin cu haya.
Un pregunta esencial ta: den ki termino nos por spera cu e retrazo aki ta worde elimina.
Un idea ta tambe pa pensa den direccion di automatizacion, segun e parlamentario.
Si na paisnan grandi manera Hulanda y Merca unda cu tin hopi mas ‘aangifte’ ta worde entrega nan por duna e hendenan nan placa na tempo, esaki lo mester por na un pais chikito manera Aruba.
Si na Aruba den menos di 6 luna pueblo por haya su placa di belasting back, e poder di compra y economia ta worde bon stimula.
Bikker a bisa cu desde cu caida di entrada den gobierno a manifesta su mes door di recesion entre otro y e gabinete anterior no a tene cuenta cu esaki debidamente, a ripara cu hopi negoshi a haya nan mes confronta cu un cobranza di parti di ontvanger, unda cu a pone beslag tambe riba e negoshinan y asina nan a haya nan mes forza pa cera porta, apesar cu nan tabata tin areglo di pago.
Awor cu lo baha BBO cu 1,5%, gobierno ta bay tin menos placa, pues ta interesante pa sa con nan ta bay haci cu asuntonan manera recesion.
Ta importante pa no pone varios compania den problema door di esaki.
