Home General Mi mes ta prepara mi ham, traha ayaca y ponche crema di...

Mi mes ta prepara mi ham, traha ayaca y ponche crema di pistacho

123
1
SHARE
- Advertisement -

jubyTur aña mi ta paga un dineral pa haya un hende pa prepara un ham di Pasco pami. Mi ta gasta un dineral den cumpramento di ayaca y mester di un ponche crema y preferiblemente di Pistacho.

Cada vez cu mi pega cu un receta, mi ta coi telefon y yama 588-4148 y grita “Auxilio Maria !!”. Or hende puntrami cierto cos cu tin di haber cu cuminda, mi ta bisa nan, “yama señora. Juddan Petit” sin bisa nan cu ta “Maria”. Despues ta e personanan aki ta trece algo di come pa mi y bisa cu nan a siña cerca Maria di “Maria ta den Cushina” y kier pa mi purba nan “obra”.


Cuanto pret mi no a pasa cu “Maria” y despues cu e tabata cu su programa na television bao di e nomber cu Patrick Paskel a dune, el a bira popular como “Maria ta den cushina”.
Diadomingo un conocir a bisami: “mi tin algo pa bo!”

El a entregami un DVD y a bisami pa papia despues cu Maria. Wow!!!!
Tabata un DVD di “Maria ta den Cushina”, un DVD special “edicion di Pasco”.
M’a sinta anochi na cas y goza di e DVD.

Hende lo no kere, pero mi a siña con pa prepara mi propio “Ham di Pasco”. Semper mi a kere cu ta un dolor di cabez pa haci esaki. M’a siña con pa traha mi propio “Ayaca”. E
sey ta poco mas trabao, pero paso pa paso manera “Maria” ta splica den su DVD, si ami lo por, ta tur hende lo por.

Mi a hayami ta mira con pa prepara y traha mi ponche crema di Pistacho. Esey tambe mi a kere ta un dolor di cabez.

ANOTACIONNAN SIN TIN NODI

M’a sinta haci anotacion pa prepara e ham (cu of sin weso). “Kita plastic; lab’e; pone den wea pa herbe un ora; ta hise pone den un baki di stainless steel y dorna e ham cu clabo….”, e ta splica entre otro na comienzo.

Te eynan mi a anota sin mira pantaya. Ora el a menciona clabo, ya mi a pensa di check den garashi pa mira ki tipo di clabo tin y ki tamaño, ademas pa mi busca mi martieu y zaag.
Maria a bisa pa semper percura pa bo tin tur cos na man pa cushina. Ta ora mi a hisa cabez, mi a haya sa ta kico Maria kiermeen cu “clabo”.

E resto mi no ta conta , pasobra lo ta mucho largo mirando e espacio cu mi tin. Pero despues di a mira e DVD di dos biaha, esta despues di anota sin mira completo, mi tabata sa exactamente kico pa haci pa prepara mi ham di Pasco.

Ata Maria a cambia pa e “Ayaca”.
E ta traha nan den 3 dia cuminsando cu preparacion di su foyonan.
Mi a anota: “ cuminza laba e foyo; corta nan; pone nan cu zeta; lora nan (asina aki) y hinca nan den saco di plastic…”

Esey tabata djis e preparacion prome cu el a bula riba preparacion di e galiña riba e di dos dia.
Mi a scucha voz di Maria cu: “cushina e galiña na bo smaak……”

Mi a sigui scucha y Maria a pasa pa di tres dia cu “saca e galiña di freezer, lague ontdooi, y nos ta traha nos mansa……etc.”

Ora el a cla cu e ayaca, m’a hisa cara y ya Maria ta dunando instruccion pa trahamento di e “Ponche Crema” di pistacho…
Atami ta anota pa loco.

TUR COS TABATA RIBA PAPEL

Ora e DVD a yega su fin, mi a dicidi di pone toca un biaha mas pa mi sigui mi anotacion y mira si mi ta corecto. Aki y aya mi a agrega algo cu mi no a anota, pero na final mi tabata contento cu mi ta cla pa drenta cushina asina cu mi tin tur ingrediente necesario pa Ham, Ayaca y Ponche Crema.

M’a cambia canal di television despues y scuchando noticia mi tabata tira un bista riba e DVD.
Ta mihor m’a haci esey for di principio. M’a perde mas di un ora haciendo anotacion por nada.

Den e DVD mes tabata tin e “foyeto” cu e receta di “Ham Horna”, receta di ayaca, paso pa paso cu 1- foyonan, 2- reyeno pa e ayaca, 3- e mansa di ayaca, 4-e preparacion di yena e ayaca y mara nan y 5- e parti final.

M’a busca e receta di ponche crema mes ora y a bin topa cune; Pistacho of mocca/strawberry/ coco.

M’a sinta despues na computer y a manda un e-mail pa : Maria ta den cushina @ hotmail etc. pa bise danki pa e Pasco bunita cu no a yega ainda.

NOMBERNAN MAS CHINES CU CRIOYO

Na comienzo di e DVD bo ta haya sa kende ta Maria Juddan Petit y con el a yega na su experticio.
Su tata koki (ahh pesey !!) , su mama trahador di bolo (ahh pesey !!)
E mes cu a sigui su hotelvakschool siña traha snacks, bay Hulanda sigui su curso di 3 aña y ricibi diploma na Breda y bin deleita nos cu su recetanan di balornan nutritivo di nos cuminda tradicional.

Nos cuminda di cas cu ta e fuente di inspiracion pe combina cu platonan internacional.
El a menciona cu e DVD ta pa amplia conocimento di nos hendenan di nos cushina tradicional, trece aprecio y amor pa nos cultura dilanti y pa e sigui crece y no bay perdi.
Ami cu ta gusta piki no a laga e oportunidad pasa pa no piki.

M’a mira Maria den un supermercado ta mustra bleki y botternan cu mi sa mira tur ora.
Mi a scucha algo manera “comehein” cu a resulta di ta “comino”.

Tambe algo manera “mos di pushi”, di gato of ta cat y cu a resulta di ta “muscat”. Tambe al a mustra un bleki ta mencionando “beey” y mi a pensa riba “Bay Rum” ora m’a mira e “bay” pero tabata trata di un marca di specerij cu Old Bay.

Ora mi a mira parti di un nomber cu “Cina”, mi a bisa cu Cinema tambe ta envolvi. Lugar.., tabata trata di “Cinamon”. Ta bon cu mi no sa nada di specerijnan pa cuminda. Pesey Pavilla 4 B tey pa mi core puntra Maria kico ta kico.

Mi no a haya Maria pa puntre si e DVD ta na benta y unda por haye, pero mi ta sigur cu esnan cu ta interesa pa siña locual mi a menciona aki riba lo tuma contacto cu Maria, pasobra pa mi e DVD ta un “Regalo inmenso di Pasco”.

Ningun hende por rei kende lo purba mi ham, ayaca y ponche crema prome, pa sa si ta un vijf of un negen mi ta haya.
Juby Naar.

- Advertisement -

1 COMMENT

DUNA COMENTARIO

Please enter your comment!
Please enter your name here